LIPESALEMA 73

Ruri Molimo o molemo ho Iseraele,

e, le ho ba pelo li hloekileng.

₂Empa 'na,

ke batlile ke khōthōmetseha,

maoto a ka a batlile a thella;

₃hobane ke ne ke hōnōhela baikakasi,

ha ke bona katleho ea ba khopo.

₄Bona ha ba na matšoenyeho,

'mele ea bona e shahlile,

ba nonne.

₅Ha ba na likhathatso

joaloka ba bang,

'me ha ba otloe

joaloka ba bang.

₆Ka baka leo,

boikhōhōmōso ke sefaha,

ke sefaha melaleng ea bona,

sehlōhō ke seaparo

seo ba se apereng.

₇Mahlo a bona

a rōtōlōhile ke mafura,

ka lipelong

ba tletse mehopolo ea booatla.

₈Baa tlaka, 'me ba bua tse mpe,

ba sokela batho ka boikhantšo.

₉Melomo ea bona

e nyefola tsa leholimo,

maleme a bona

a bèbèra tsa lefatše.

₁₀Kahoo sechaba sa ka

se ba sala morao,

se inyorolla ka metsi

a mehopeng ea bona.

₁₁Ba re: “Molimo a ka tseba joang?

Na tsebo e teng

ho Ea Holimo-limo?”

₁₂Ba khopo ba joalo;

kamehla ba qhoaolla likobo,

ba ikatisetsa maruo.

₁₃Ho thusa'ng ho hloekisa pelo ea ka,

le ho hlokisa matsoho a ka molato,

₁₄ha e le moo ke otloa

ka matsatsi 'ohle,

ke otloa hoseng ho hong le ho hong?

₁₅Hoja nkile ka re:

“Ke tla bua joaloka bona,”

nkabe ke khelohile molōkong,

molōkong oa bana ba hao.

₁₆Ha ke ntse ke naha-nahana,

ka nahana hore ke utloisise tsena,

ka fumana e le ntho e thata,

₁₇ho fihlela ke ba ke kena Sehalalelong,

Sehalalelong sa Molimo,

'me ke utloisisa

seo qetello ea ba khopo

e tla ba sona.

₁₈Ruri u ba beile moo ho thellang,

ua ba lihela hore ba ee timelong;

₁₉ba fetoha lesupi

ka ho panya ha ntši,

ba felile,

qetello ea bona ke e tšosang.

₂₀Morena, joalokaha toro e fela,

e fela ha motho a phaphama,

le uena ha u tsoha

u felisa seriti sa bona.

₂₁Ha pelo ea ka

e ne e utloile bohlōkō,

'me maikutlo a ka a hlabehile,

₂₂ka ba leoatla, ka hloka kutloisiso,

ka ba joaloka phoofolo

mahlong a hao.

₂₃Empa leha ho le joalo,

ke na le uena kamehla,

u ntšoere ka letsoho le letona.

₂₄U ntsamaisa ka keletso ea hao,

'me qetellong

u tla nkamohela ka tlōtla.

₂₅Nka ba le mang leholimong

haese uena?

Ha ke e-na le uena,

ha ke sa lakatsa letho lefatšeng.

₂₆Leha 'mele oa ka

le pelo ea ka li ka fela,

Molimo ke lefika la ka

le kabelo ea ka kamehla.

₂₇Ha e le ba ikarohantseng le uena,

bona ba tla timela;

u felisa bohle

ba sa tšepahaleng ho uena.

₂₈Empa ho 'na ho ba haufi le Molimo,

ke eona ntho e molemo.

Ke ikhethetse Morena,

Morena oa ka,

ho ba setšabelo sa ka,

ke tle ke bolele

mesebetsi ea hae eohle.