LIPESALEMA 7

₂Morena Molimo oa ka,

ke tšabela ho uena,

ke tšabela ho uena, ak'u mpholose,

u 'namolele

ho bohle ba ntlhorisang;

₃esere ba mphamola joaloka tau,

ba ntsekolla ho se ea 'namolelang.

₄Morena Molimo oa ka,

haeba ke entse tsena:

ha ke sebelitse bokhopo

ka liatla tsa ka,

₅ha ke entse mothusi oa ka hampe,

ha ke senyelitse sera sa ka

ho se lebaka,

₆lira li ke li ntelekise, li ntšoare,

li ke li nkhatakelle fatše,

li mpolaee,

li nkepele lerōleng.

₇Thusa, Morena, u ntse u halefile!

U tsohele lira tsa ka tse bohale,

u li tsohele matla;

tsoha Molimo oa ka,

uena ea lihang kahlōlo.

₈Phutheho ea lichaba

e ke e u bokanele;

uena u lule holimo-limo,

u e okamele.

₉Morena o ahlōla lichaba.

Nkahlōlele, Morena,

ho ea ka ho loka ha ka,

le ho ea ka ho hloka koli ha ka.

₁₀Bobe ba ba khopo bo ke bo fele,

'me u tiise ba lokileng,

uena ea hlahlobang moea le pelo,

uena Molimo ea lokileng.

₁₁Thebe ea ka ke Molimo,

ea pholosang ba pelo li ntle.

₁₂Molimo ke moahlōli ea lokileng,

ea ahlōlang kamehla eohle.

₁₃Ha motho a sa bake,

Molimo o tla leotsa sabole ea hae,

a hule seqha sa hae, a se chehe;

₁₄a lokise libetsa tse bolaeang,

metsu ea hae

a e etse litsenene tse malakabe.

₁₅Bonang, e mobe

o emōla tse manyala,

o emara bokhopo,

'me o tsoala thetso.

₁₆O chekile lemena, a le tebisa,

a oela hona lemeneng

leo a le chekileng.

₁₇O jeloe ke bokhopo ba hae,

sehlōhō sa hae se mo oetse holimo.

₁₈Ke boka Morena

ka baka la toka ea hae,

ke roka lebitso la Morena

Ea Holimo-limo.