Sechaba se kōpa thuso ntoeng
1Pesalema ea Davida, e nang le thuto. Taelo ho motsamaisi oa libini: E binoe ka 'mino oa sefela sa “Mohalalitoe oa bopaki”. 2Ke ea mohla Davida a neng a loana le Baarame ba Naharaime le ba Soba, ha Joabe a khutlela ho ea hlōla Baedomo ba kete tse leshome le metso e 'meli Khohlong ea Letsoai.
3Molimo, u re lahlile, u re ripitlile;
u ne u halefile,
empa joale ak'u khutle,
u khutlele ho rōna.
4U reketlisitse lefatše, ua le petsola;
ak'u thibe mapatso a lona,
hobane lea qhèhèmana.
5U bontšitse chaba sa hao bothata,
u re noesitse joala
bo re tsekelisang.
6U mokhele ho ba u tšabang,
hore ba phonyohe metsu ea sera,
7baratuoa ba hao ba tle ba lopolloe.
Re pholose
ka letsoho la hao le letona,
re pholose, u be u re utloe.
8Molimo o buile
a le Sehalalelong sa hae,
o buile a le ho sona, a re:
“Ke nyakaletse,
ke tla arola Shekeme,
ke sehe khohlo ea Sukote likoto.
9Gileade ke ea ka,
le Manase ke ea ka,
Efraime ke katiba ea ka ea tšepe,
Juda eena ke lere la ka la puso.
10Moabe ke lefiso la ho itlhatsoetsa,
leo ke itlhatsoetsang ho lona,
Edomo eona ke tla e hapa,
Filesitiea teng
ke tla etsa litlatse tsa tlhōlo.”
11Ke mang ea tla nkisa motseng,
motseng oa liqhobosheane?
Ke mang ea tla mphihlisa Edomo,
12ha e le moo uena, Molimo,
u re lahlile,
u se u sa tsoe le mabōtho a rōna?
13Ak'u re thusetse lireng tsa rōna,
hobane thuso ea motho ke lefeela.
14Ka thuso ea Molimo
re tla loana senna,
ke eena ea tla hatakela lira tsa rōna.
