LIPESALEMA 6

₂Oho, Morena,

u se ke ua nkotla u nkhalefetse,

u se ke ua nkhalemela u le bohale.

₃Nkhauhele Morena,

hobane ke feletsoe ke matla;

mpholise Morena,

hobane ke opeloa ke masapo,

₄'me ke sareloa haholo.

Empa uena Morena,

u tla lieha ho fihlela neng?

₅Khutla Morena, u 'namolele,

u mpholose

ka baka la mohau oa hao.

₆Bafu ba ke ke ba u hopola;

ke mang ea ka u tlotlisang

Qalong ea Bafu?

₇Ke khathetse ke ho 'na ke feheloa;

ka masiu 'ohle ke kolobisa liphate,

ke kolobisa liphate tsa ka ka meokho,

ke tšèla mosamo oa ka

ka likhapha.

₈Mahlo a ka a motela ke masoabi,

a fifala ka baka la batubi ba ka.

₉Tlohang ho 'na,

lōna bohle ba khopo,

hobane Morena o utloile sello sa ka.

₁₀Morena o utloile kōpo ea ka,

Morena o amohetse thapelo ea ka.

₁₁Lira tsa ka tsohle

li tla hlajoa ke lihlong,

li tšohe haholo;

li tla checha,

li hlajoe ke lihlong hang-hang.