LIPESALEMA 59

₂Molimo oa ka,

ak'u 'namolele lireng tsa ka,

u ntšireletse

ho ba ntsohetseng matla.

₃Ak'u 'namolele

ho ba etsang tse khopo,

u mpholose

ho ba ratang ho tšolla mali.

₄Ke bao ba matla ba bokane,

ba ntaletse,

le hoja ke se na molato

kapa sebe, Morena.

₅Baa potlaka, ba itokisetsa 'na,

le hoja ke sa etsa phoso;

tsoha, u nkhahlanyetse,

'me u bone.

₆Uena Morena,

Molimo oa mabōtho,

Molimo oa Iseraele,

tsoha, u otle balichaba bohle,

u se ka ua hauhela le ea mong,

le ea mong oa mahlabaphieo ao.

₇Kamehla ba khutla ka phirimana,

ba rore sa lintja,

ba sōlle har'a motse.

₈Ke bao ba bèbèra haholo,

ka melomong ea bona

ho tsoa lisabole,

'me ba re:

“Ke mang ea re utloang?”

₉Empa uena Morena, ua ba tšeha,

u soma balichaba bohle.

₁₀Uena u leng matla a ka,

ke shebile uena,

hobane Molimo

ke qhobosheane ea ka.

₁₁Molimo ea nkhauhelang

o tla nthusetsa,

Molimo o tla etsa hore

ke telle ba ntaletseng.

₁₂U se ke ua ba bolaea,

esere chaba sa heso sa lebala;

u ba qhale ka matla a hao,

u ba lihe,

uena Morena, thèbè ea rōna.

₁₃Sebe sa bona ke mantsoe a bona,

mantsoe a tsoang

melomong ea bona;

ba tšoasoe

ke boikhōhōmōso ba bona,

ka baka la lithōhako,

le 'ona mashano ao ba a buang.

₁₄Ba felise ka khalefo ea hao;

ba felise, ba se hlole ba e-ba teng,

ba tle ba tsebe hore

Molimo oa busa,

o busa ntlo ea Jakobo,

ho isa lipheletsong tsa lefatše.

₁₅Kamehla ba khutla ka phirimana,

ba rore sa lintja,

ba sōlle har'a motse,

₁₆ba shōte, ba batle lijo,

ba koma-kome ha ba sa khōre.

₁₇Ha e le 'na ke tla bina,

ke rorise matla a hao,

e sa le hosasa ke tla bolela,

ke bolele tsa mohau oa hao,

ke li bolele ka mehoo ea thabo,

hobane u bile qhobosheane ea ka,

u bile setšabelo sa ka

mohl'a tsatsi

la matšoenyeho a ka.

₁₈Uena u leng matla a ka,

ke tla u roka,

hobane Molimo

ke qhobosheane ea ka,

ke Molimo ea nkhauhelang.