Molimo o ahlōla ea sehlōhō
1Pesalema ea Davida. Thothokiso e nang le thuto; 2ea mohla Doege, Moedomo, a neng a tlil'o tsebisa Saule hore Davida o kene tlung ea Abimeleke.
3U ithorisetsa'ng ka bobe,
uena ea sehlōhō?
Tseba, mohau oa Molimo
ke oa kamehla eohle.
4U ntse u rera ho timetsa ba bang,
leleme la hao le ka lehare le bohale,
uena ea etsang bolotsana.
5U rata bobe ho e-na le botle,
le leshano ho e-na le 'nete.
6U rata lipuo tse timetsang,
uena ea leleme le thetsang!
7Molimo o tla u ripitlela ruri,
a u hloibile,
a u hōtōlele ntle ho tente ea hao,
a u felise
lefatšeng la ba phelang.
8Ba lōkileng ba tla bona tsena,
'me ba tšabe;
ba tla mo tšeha, ba re:
9“Bonang motho
ea sa etsang Molimo tšabelo sa hae,
ea itšepetseng bongata
ba maruo a hae,
ea entseng bokhopo
setšabelo sa hae.”
10Empa 'na, ka tlung ea Molimo,
ke joaloka sefate sa mohloaare,
fate se setalana;
ke tšepa mohau oa Molimo,
ke o tšepa kamehla le mehla.
11Ke tla u boka kamehla
ka seo u se entseng,
ke tlotlise bitso la hao
ke le har'a batšepuoa ba hao,
hobane uena u molemo.
