LIPESALEMA 43

₁Molimo, ak'u nkahlōlele,

u emele nyeoe ea ka,

u ntšireletse ho batho bana,

batho bana ba se nang mohau,

u ntopolle ho motho ea thetsang,

u ntopolle le ho ea bolotsana.

₂Molimo, ke uena

eo ke tšabelang ho uena;

joale u ntahletse'ng?

Ke'ng ha ke tsamaea ke hlomohile,

ke hlomohile

ka baka la khatello ea sera?

₃Nthōmelle leseli la hao

le 'nete ea hao,

li tle li ntsamaise,

li mphihlise

thabeng ea hao e halalelang,

li mphihlise leahong la hao.

₄Ke tla fihla aletareng ea Molimo,

ho Molimo ea nthabisang.

Ke tla nyakalla, ke u boke ka harepa,

uena Molimo, Molimo oa ka.

₅Moea oa ka, u nyahametse'ng?

U hloretse'ng ka sefubeng sa ka?

Tšepa Molimo.

Ke sa tla 'ne ke 'moke,

eena mopholosi oa ka

le Molimo oa ka.