Thapelo ea motho ea hlolohetsoeng Molimo
1Thothokiso e nang le thuto, ea bara ka Kora, e qapetsoeng motsamaisi oa libini.
2Joalokaha khama
e labalabela metsi a melatsoana,
le oona moea oa ka
o u labalabela joalo,
o labalabela uena Molimo.
3Moea oa ka o nyoretsoe Molimo,
o nyoretsoe Molimo ea phelang:
Ke tla ea neng,
ke e'o hlaha kapel'a Molimo?
4Ke phela ka likhapha
motšeare le bosiu,
ha kamehla ho ntse ho thoe ho 'na:
“O kae Molimo oa hao?”
5Moea oa ka oa qhashoha,
o qhashoha ha ke hopola tsena:
Ke ne ke tsamaea mokolokong,
ke o eteletse pele,
ho ea tlung ea Molimo
har'a mehoo ea thabo le ea teboho,
ha matšoele a e-ea moketeng.
6Moea oa ka, u nyahametse'ng?
U hloretse'ng ka sefubeng sa ka?
Tšepa Molimo.
Ke sa tla 'ne ke 'moke,
eena mopholosi oa ka
le Molimo oa ka.
7Moea oa ka o nyahame;
ke kahoo ke u hopolang Molimo,
ke le naheng ea Jorodane,
le thabeng tsa Heremone,
le thabaneng ea Misare.
8Boliba bo arabela boliba
ka ho hoasa ha liphororo tsa hao,
maqhubu le merallo eohle ea hao
e fetile holim'a ka.
9Motšeare Morena o tla ntšitsa,
a ntšitse ka mohau oa hae;
bosiu ke tla 'minela,
ke rapele Molimo ea mphelisang.
10Ke tla re ho Molimo, Lefika la ka:
“U ntebaletse'ng?”
Ke'ng ha ke tsamaea ke hlomohile
ka baka la khatello ea sera?
11Ke robehile litho
ke ho tlakoa ke lira tsa ka,
ha kamehla li ntse li re ho 'na:
“O kae Molimo oa hao?”
12Moea oa ka, u nyahametse'ng?
U hloretse'ng ka sefubeng sa ka?
Tšepa Molimo.
Ke sa tla 'ne ke 'moke,
eena mopholosi oa ka
le Molimo oa ka.
