LIPESALEMA 41

₂Ho lehlohonolo

ea hlokomelang mofutsana;

Morena o tla mo lopolla,

a mo lopolle mohl'a tsatsi la tlokotsi.

₃Morena o tla mo sireletsa,

a mo phelise hamonate lefatšeng;

a ke ke a tlohella lira tsa hae

ho etsa borata ka eena.

₄Morena o tla mo thusa

liphateng tsa lefu,

a 'ne a fetole liphate tsa hae,

a li fetole ha a ntse a kula.

₅Ha e le 'na ke ile ka re:

“Morena, nkhauhele,

mpholise hobane ke u sitetsoe.”

₆Lira tsa ka li tla mpua hampe, li re:

“O tla shoa neng,

lebitso la hae le tsoe le fela?”

₇Ha motho a tlil'o mpona,

o bua mafeela,

pelo ea hae e roalla tse mpe,

tseo etlare hoba a tsoe,

a tsamaee a li hasanya.

₈Bohle ba ntlhoileng

ba bokanela ho ntšeba,

ba ntherela bomalimabe.

₉Ba re: “O kenoe ke lefu le lebe,

o rapaletse, a ke ke a hlola a tsoha.”

₁₀Esita le motsoalle

oa hlooho ea khomo,

eo ke ntšanang se inong le eena,

o nthahile ka serethe.

₁₁Empa uena Morena,

ak'u nkhauhele, u ntsose,

ke tle ke ba buseletse.

₁₂Ka hona ke tla tseba

hore u khahloa ke 'na,

ha sera sa ka

se se se sa ithorisetse 'na.

₁₃U tla mpōlōka ke se na koli,

u mpee kapel'a hao kamehla.

₁₄Ho bokoe Morena,

Molimo oa Iseraele,

kamehla eohle,

e se nang qaleho le qetello.

Amen. Amen.