LIPESALEMA 38

₂Oho, Morena,

u se ke ua nkotla u nkhalefetse,

u se ke ua nkhalemela u le bohale.

₃Metsu ea hao e ntlhabile,

letsoho la hao le nkotlile habohlōkō.

₄Ha ho moo ho seng bohlōkō

'meleng oa ka,

ka baka la khalefo ea hao;

ha ho bophelo masapong a ka,

ka baka la sebe sa ka.

₅Melato ea ka e mpupelitse hlooho,

e nkimela joaloka mojaro o boima.

₆Maqeba a ka aa nkha,

a phephetha bolalu,

ka baka la bothoto ba ka.

₇Ke kotlobane, kea khokhoba,

ke tsamaea tsatsi lohle ke hlomohile.

₈Letheka la ka lea futha,

ha ho moo ho seng bohlōkō

'meleng oa ka.

₉Kea fokola, ke robehile litho,

ke lumaela ka baka la ho hlora

ha pelo ea ka.

₁₀Morena, u tseba tsohle

tseo ke li lakatsang,

ho feheloa ha ka

ha hoa pateha ho uena.

₁₁Pelo ea ka e otla habohlōkō,

ke feletsoe ke matla;

mahlo a ka a fifetse.

₁₂Metsoalle le balekane ba ka

ba emeletse thōko le bohlōkō ba ka,

baheso ba emeletse hōle le 'na.

₁₃Ba batlang bophelo ba ka,

ba nchehile ka maraba,

ba ntakaletsang bomalimabe,

ba ntherela timelo,

tsatsi lohle ba ntōhela mano.

₁₄Empa 'na ke joaloka tsebe-tutu,

ha ke utloe;

ke joaloka semumu,

ha ke bue.

₁₅'Na ke joaloka motho

ea sa utloeng litsebeng,

eo molomong oa hae

ho seng likhang.

₁₆Morena, ke tšepile uena;

ke uena ea tla nkaraba,

Morena Molimo oa ka,

₁₇ha ke re:

“Ba se ke ba ithabisa ka 'na,

ba ithorisa ha leoto la ka le thella.”

₁₈Ke lekhatheng la ho oa,

ke utloa bohlōkō kamehla.

₁₉Ke bolela molato oa ka,

ke soabela sebe sa ka.

₂₀Ba itšemmeng bora ho 'na

ba matla,

ba ntlhoileng ntle ho lebaka

ba ngatafetse,

₂₁e leng ba mpuseletsang

botle ka bobe,

ba nqosang hobane ke latela botle.

₂₂Morena, u se ke ua ntahla;

Molimo oa ka, se be hōle le 'na.

₂₃Phakisa u nthuse,

Morena, uena mopholosi oa ka.