LIPESALEMA 37

U se ke ua itlhonamisa

ka ba etsang bokhopo,

u se ke ua hōnōhela

ba etsang tse sa lokang.

₂Ba tla omella kapele joaloka joang,

ba tla pona joaloka litlama,

litlama tse talana.

₃Tšepa Morena, u etse botle,

u tle u iphelele lefatšeng ka khotso.

₄Thabela Morena,

'me o tla u nea tse lakatsoang

ke pelo ea hao.

₅Ipee matsohong a Morena;

u mo tšepe, ho tla sebetsa eena.

₆O tla etsa

hore ho loka ha hao ho khanye,

ho khanye joaloka leseli,

le litokelo tsa hao

li khanye joaloka letsatsi

motšeare o moholo.

₇Khoba matšoafo, u lebelle Morena;

u se ke ua itlhonamisa

ka eo tsohle li mo atlang,

e leng

ea phethang merero e khopo.

₈Khaotsa ho halefa, u tlohele bohale;

u se ke ua itlhonamisa,

esere ua etsa bobe.

₉Ba etsang bokhopo ba tla felisoa;

empa ba tšepang Morena

lefatše e tla ba lefa la bona.

₁₀Ho se ho se hokae:

Ea khopo o tla be a nyametse;

leha u talima tulong tsa hae,

o tla be a le sieo.

₁₁Ba ikokobetsang,

lefatše e tla ba lefa la bona,

ba thabele khotso e phethehileng.

₁₂Ea khopo o rera ea lokileng,

o mo tsikitlanyetsa meno;

₁₃empa Morena o tšeha ea khopo,

hobane o bona hore

tsatsi la hae lea tla.

₁₄Ba khopo

ba tsomula sabole tsa bona,

ba hula liqha tsa bona,

ho fula bahlōphehi le mafutsana,

ho bolaea ba metsamao e metle.

₁₅Sabole tsa bona

li tla ba hlaba lipelo,

liqha tsa bona li tla robeha.

₁₆Sejo-senyane sa ea lokileng

se molemo

ho e-na le khora ea ea khopo;

₁₇hobane matla a ea khopo

a tla felisoa,

athe Morena o tšehetsa ea lokileng.

₁₈Morena o tseba litšiu

tsa ba hlokang koli,

lefa la bona e tla ba le sa feleng.

₁₉Ba ke ke ba hlajoa ke lihlong

nakong tse mpe,

matsatsing a tlala ba tla khora.

₂₀Empa ba khopo ba tla timela;

bao e leng lira tsa Morena

ba tla fela joaloka botle ba makhulo,

ba nyamele joaloka mosi.

₂₁Ea khopo oa alima,

empa ha a busetse;

ea lokileng o na le mohau, oa fana.

₂₂Bao Morena a ba hlohonolofalitseng

lefatše e tla ba lefa la bona;

bao a ba rōhakileng ba tla felisoa.

₂₃Morena ke eena

ea tiisang mehato ea batho,

'me o khahloa ke metsamao ea bona.

₂₄Leha ba ka oa, ha ba tjapallele ruri,

hobane Morena

o ba nenesa ka letsoho.

₂₅Nkile ka ba mocha,

kajeno ke tsofetse,

empa ha ke e-s'o bone

ea lokileng a lahliloe,

le litlōhōlō tsa hae li kōpa bohobe.

₂₆Kamehla ea lokileng o mohau,

oa alimana,

'me litlōhōlō tsa hae

ke tlhohonolofatso.

₂₇Furalla bobe, u etse botle,

u tle u be le leaho kamehla.

₂₈Morena o rata ho lōka,

'me a ke ke

a furalla batšepuoa ba hae.

Ba khopo ba tla timella ruri,

litlōhōlō tsa bona li tla felisoa.

₂₉Ba lokileng

lefatše e tla ba lefa la bona,

ba phele ho lona kamehla le mehla.

₃₀Molomo oa ea lokileng

o bolela tsa bohlale,

leleme la hae le bua tsa ho loka.

₃₁Molao oa Molimo oa hae

o ka pelong ea hae,

maoto a hae ha a thelle.

₃₂Ea khopo o laletse ea lokileng,

o batla ho 'molaea.

₃₃Morena a ke ke

a mo tlohella matsohong a eo,

Morena a ke ke

a lumela hore a ahloloe,

a fumanoe a le molato,

ha a qosoa.

₃₄Tšepa Morena,

u tiee tseleng ea hae;

o tla u phahamisa,

lefatše e tle e be lefa la hao,

'me u bone ba khopo ha ba felisoa.

₃₅Ke bone motho ea khopo,

motho oa mohatelli,

a atleha sa fate sa leholela;

₃₆ka boela ka feta,

ka bona a se a le sieo;

ka 'matla,

a se ke a hlola a fumanoa.

₃₇Hlokomela ea phethehileng,

u talime ea lokileng:

Motho oa khotso

o tla ba le litlōhōlō;

₃₈empa baetsalibe

ba tla timetsoa ho hang,

le litlōhōlō tsa ba khopo

li tla felisoa.

₃₉Pholoho ea ba lokileng

e tsoa ho Morena,

ke eena setšabelo sa bona

nakong ea tlokotsi.

₄₀Morena oa ba thusa, oa ba lopolla;

o tla 'ne a ba lopolle ho ba khopo,

a ba pholose,

hobane ba tšabetse ho eena.