LIPESALEMA 35

Morena,

ak'u loantše ba ntoantšang,

u futuhele ba mphutuhelang.

₂Tšoara thèbè le thejana,

u eme, u nthusetse.

₃Nka lerumo le koakoa,

u thibe ba ntlhorisang.

E-re ho 'na:

“Ke 'na pholoho ea hao.”

₄Bao ba batlang bophelo ba ka,

ba ke ba hlajoe ke lihlong,

ba tlontlolohe;

bao ba ntherelang bobe,

ba ke ba cheche, ba ferekane.

₅Ba ke ba tšoane le 'mōkō,

'mōkō o fefoloang ke moea,

ha lengeloi la Morena

le ba kharametsa.

₆Tsela ea bona e ke e fifale, e thelle,

ha lengeloi la Morena le ba lelekisa.

₇Ba nchehile ka leraba ntle ho lebaka,

ba ncheketse lemena ntle ho lebaka.

₈Tlokotsi e ke e ba oele holimo,

e ba oele ka tsometso;

ba ke ba tšoasoe ke leraba

leo ba le chehileng,

ba oele lemeneng

leo ba le chekileng.

₉Joale 'na ke tla thabela Morena,

ke nyakallele ho pholosoa ke eena.

₁₀Masapo a ka 'ohle a tla re:

“Morena, ke mang ea kang uena,

uena molopolli oa mohlōphehi

ho ea mo fetang ka matla,

le oa mohlōphehi le mofutsana

ho ea mo tlatlapang?”

₁₁Lipaki tse khopo li eme lepaketla,

li mpotsa taba tseo ke sa li tsebeng.

₁₂Batho ba mputsa ka bobe

bakeng sa botle,

moea oa ka o qetoa ke bolutu.

₁₃Empa ha ba ne ba kula,

'na ke ile ka apara tse mahoashe,

ka itlhōkōfatsa ka ho itima lijo,

ka ba rapella ke sa khaotse,

₁₄joalokaha eka ke rapella motsoalle,

kapa ke rapella ngoan'eso.

Ka tsamaea ke iname, ke hlomohile,

joaloka ea llelang 'm'ae.

₁₅Ha ke e-oa, baa thaba,

baa mpokanele;

ba mpokanele

ka mokhoa oa tsometso,

ba nkotle ba sa khaotse.

₁₆Baphoqi ha ba phetse ho ntšoma,

ba ntsikitlanyetsa meno.

₁₇Morena, u tla shebella hoo

ho fihlela neng?

Pholosa bophelo ba ka

bataneng tse purumang;

ke bona feela,

bo pholose taung tsena.

₁₈Ke tla u boka phuthehong e kholo,

ke u rorise har'a letšoelehali.

₁₉Ba itšemmeng bora ho 'na

ba se ithabise ka 'na,

ba ntlhoileng ntle ho lebaka

ba se 'nyemotse;

₂₀hobane ha ba bue tsa khotso,

empa batho ba khotso,

ba fatše lena,

ba ba lōhela mano.

₂₁Ba nkahlamiselitse melomo, ba re:

“Aha! Aha! Re u bone!”

₂₂Ke uena Morena, ea boneng;

se khutse!

Morena, u se ke ua ba hōle le 'na.

₂₃Phaphama, tsoha, u nkahlōlele,

lokisa nyeoe ea ka,

Molimo oa ka, Morena oa ka.

₂₄Nkahlōlele ho ea ka toka ea hao,

Morena Molimo oa ka,

batho bao ba tle ba se ke

ba ithabisa ka 'na.

₂₅Ka lipelong tsa bona ba se re:

“Aha! Re mo fumane!”

Hape ba se re: “Re mo metsitse!”

₂₆Bao ba thabelang bobe ho 'na

ba ke ba hlajoe ke lihlong,

ba ferekane 'moho;

bao ba iphahamisetsang 'na

ba ke ba apareloe ke lihlong,

ba tlontlolohe.

₂₇Ba khahloang ke ho loka ha ka

ba ke ba thabe, ba etse litlatse;

kamehla ba re: “Morena o moholo,

eena ea khahloang ke khotso,

khotso ea mohlanka oa hae!”

₂₈Leleme la ka

le tla bolela ho loka ha hao,

le u rorise ka matsatsi 'ohle.