LIPESALEMA 24

Lefatše ke la Morena

le tsohle tse ho lona,

lefatše le bohle

ba ahileng ho lona.

₂Ke eena ea le theileng

holim'a maoatle,

a le tiisa holim'a maliba.

₃Ke mang ea ka nyolohelang

thabeng ea Morena?

Ke mang ea ka emang

Sehalalelong sa hae?

₄Ke ea matsoho a hlokang molato,

ea pelo e hloekileng,

ea sa lakatseng mafeela,

ea sa hlapanyetseng leshano.

₅O tla fumana lehlohonolo

ho Morena,

le ho loka ho Molimo,

mopholosi oa hae.

₆O joalo molōko

oa ba batlang Molimo,

ba ratang ho bona fahleho sa hao,

uena Molimo oa Jakobo.

₇Lōna menyako, bulehang!

Ipuleng, lōna menyako

ea boholo-holo,

ho tle ho kene Khosi e tlōtlehang.

₈Khosi eo e tlōtlehang ke mang?

Ke Morena ea matla, oa mohale,

Morena eo e leng mohale ntoeng.

₉Lōna menyako, bulehang!

Ipuleng, lōna menyako

ea boholo-holo,

ho tle ho kene Khosi e tlōtlehang.

₁₀Khosi eo e tlōtlehang ke mang?

Ke Morena oa mabōtho,

ke eena Khosi e tlōtlehang.