LIPESALEMA 148

₁Haleluja!

Rorisang Morena,

lōna ba maholimong,

mo roriseng,

lōna ba holimo-limo.

₂Mo roriseng,

lōna mangeloi a hae kaofela,

mo roriseng,

lōna mabōtho a hae 'ohle.

₃Mo roriseng,

lōna letsatsi le khoeli,

mo roriseng,

lōna linaleli tsohle tse phatsimang.

₄Mo roriseng,

lōna maholimo a holimo-limo,

le lōna metsi

a kaholimo ho maholimo.

₅Tsohle li ke li rorise

lebitso la Morena,

hobane o ile a laela,

'me tsa hloleha.

₆O entse hore li be teng

kamehla le mehla,

a li beela taelo

eo li ke keng tsa e tlōla.

₇Rorisang Morena,

lōna ba lefatšeng,

lōna likhanyapa tsa maoatle

le tsa maliba 'ohle;

₈lōna mollo le sefako,

lehloa le moholi,

moea oa sefefo

o phethang taelo ea hae;

₉lōna lithaba le maralla 'ohle,

lifate tsa litholoana

le tsa likedare tsohle;

₁₀lōna liphoofolo tsa naha

le tsa hae tsohle,

lihahabi le linonyana tse fofang;

₁₁lōna likhosi tsa lefatše

le lōna merabe eohle,

mahosana le baahlōli bohle

ba lefatše;

₁₂lōna bahlankana le lōna baroetsana,

maqheku le lōna ba bacha.

₁₃Tsohle li rorise

lebitso la Morena;

ke lona feela

le lokelang ho tlotlisoa,

botlotlehi ba hae bo phahame,

bo phahametse lefatše,

bo phahametse le maholimo.

₁₄O tsositse sechaba sa hae molota,

ke seo batšepuoa ba hae

ba ithorisang ka sona,

bana ba Iseraele,

sechaba se leng haufi le eena.

Haleluja!