LIPESALEMA 143

Morena, ak'u utloe thapelo ea ka,

u sekehele thapeli ea ka tsebe;

u nkarabe

ka baka la botšepehi ba hao,

le ka baka la ho loka ha hao.

₂U se ke ua qosa mohlanka oa hao,

hobane ho uena

ha ho ea lokileng.

₃Sera sea ntelekisa,

se nkhatakella fatše,

se mphelisa lefifing

joaloka ba shoeleng khale-khale.

₄Moea oa ka o imetsoe,

pelo ea ka e thethefetse,

e thethefetse ka sefubeng sa ka.

₅Ke hopola litšiu tsa boholo-holo,

ke lohotha liketso tsa hao tsohle,

ke nahana mesebetsi,

mesebetsi ea matsoho a hao.

₆Ke phahamisa matsoho a ka,

ke a phahamisetsa ho uena,

moea oa ka o u nyoretsoe

joaloka lefatše le omeletseng.

₇Morena, ak'u nkarabe kapele;

moea oa ka oa tepella.

U se ke ua mpatela

sefahleho sa hao,

ke se ke ka tšoana

le ba theohelang lebitleng.

₈Etsa hore ke tsebe mohau oa hao,

ke o tsebe e sa le hoseng,

hobane ke u tšepile;

mpontše tsela

eo nka tsamaeang ka eona,

hobane ke u rapela

ka moea oa ka oohle.

₉Morena, ak'u 'namolele,

u 'namolele lireng tsa ka,

hobane ke tšabetse ho uena.

₁₀Nthute ho phetha thato ea hao,

hobane ke uena Molimo oa ka.

Moea oa hao o motle

o ke o ntsamaise,

o ntsamaise tseleng e bataletseng.

₁₁Morena, u tla 'nea bophelo

ka baka la lebitso la hao,

u ntopolle matšoenyehong

ka baka la ho loka ha hao.

₁₂Ka baka la mohau oa hao ho 'na,

u tla timetsa lira tsa ka,

u felise bohle ba ntoantšang,

hobane 'na ke mohlanka oa hao.