LIPESALEMA 110

Morena o itse ho Morena oa ka:

“Lula ka letsohong la ka le letona,

ho fihlela ke bea lira tsa hao

katlas'a maoto a hao.”

₂Morena o tla namisa 'muso oa hao,

a o namise ho tloha Sione;

a re: “Busa har'a lira tsa hao.”

₃Sechaba sa hao se tla ithaopa,

mohla u futuhelang lira tsa hao.

Joaloka phōka e lalang kameso,

bahlankana ba tla tla ho uena

maralleng a halalelang.

₄Morena o hlapantse,

ha a ka ke a koeneha;

o itse: “U moprista kamehla eohle,

joaloka Meleki-Sedeke.”

₅Morena o ka lehlakoreng la hao,

hlakoreng le letona,

o tla thuakanya likhosi

mohl'a letsatsi la khalefo ea hae.

₆O tla ahlōla lichaba, ho tlale litōpō;

o tla thuakanya hlooho tsa sera

ka bophara ba lefatše.

₇Ha khosi e le tseleng,

e tla noa nōkaneng,

e be moo e tsohang molota.