LIPESALEMA 109

Molimo, uena eo ke u rorisang,

u se ke ua khutsa,

₂hobane ba khopo le ba leshano

ba ahlamisitse melomo

ho ntoantša.

Ba bua le 'na

ka maleme a thetsang,

₃ba ntèèla hare ka lipuo tsa lehloeo,

ba mphutuhela ntle ho lebaka.

₄Ba mpuseletsa lerato la ka,

ba mpuseletsa lona ka ho nqosa,

leha ke ntse ke ba rapella.

₅Ba mputsa ka bobe bakeng sa botle,

le lehloeo bakeng sa lerato.

₆Ak'u bee ea khopo

ho ahlōla motho eo,

moqōsi oa hae a 'ne a eme

ka hlakoreng la hae le letona.

₇Ha a ahlōloa

a ke a fumanoe a le molato,

thapeli ea hae e nkuoe e le sebe.

₈Litšiu tsa hae li ke li khutsufale,

e mong a ke a nke

mosebetsi oa hae.

₉Bana ba hae e k'e be likhutsana,

le mosali oa hae e be mohlolohali.

₁₀Bana ba hae ba lelere,

e be mekōpa-kōpa,

ba lelekoe thakong tsa habo bona.

₁₁Moalimani a ke a mo amohe

sohle seo a nang le sona;

batho basele ba ikhapele

tholoana tsa mofufutso oa hae.

₁₂Ho se be motho ea mo hauhelang,

kapa ea thusang likhutsana tsa hae.

₁₃Litlōhōlō tsa hae li ke li timetsoe,

mabitso a tsona a hlakoloe

melōkong e hlahlamang.

₁₄Molato oa bo-ntat'ae

o 'ne o hopoloe ke Morena,

sebe sa 'm'ae

se se ke sa hlakoloa;

₁₅Morena a 'ne a li hopole kamehla,

a ba hlakole lefatšeng,

hore ba se hlole ba hopoloa.

₁₆Motho eo ha aa ka a hopola,

a hopola ho ba mohau,

empa a hlorisa mohlōphehi,

a hlorisa le mofutsana,

a tle a bolaee ea tepeletseng pelo.

₁₇A rata ho rōhakana:

Thōhako e k'e be holim'a hae!

Ha aa ka a thabela tlhohonolofatso:

E k'e be hōle le eena!

₁₈A apara thōhako joaloka kobo:

E k'e monyele 'meleng oa hae,

e monyele joaloka metsi,

le masapong a hae joaloka ole.

₁₉E k'e be joaloka seaparo

seo a ipōpileng ka sona,

e be joaloka leqhama

leo a itlamileng ka lona kamehla.

₂₀Morena a ke a putse

baqosi ba ka joalo,

batho bana ba mpuang hampe.

₂₁Empa uena Morena, Moren'a ka,

ak'u nthusetse

ka baka la lebitso la hao,

u 'namolele

ka baka la mohau oa hao o molemo.

₂₂Ke mohlōphehi, ke mofutsana,

pelo ea ka e thulame

ka sefubeng sa ka.

₂₃Ke ikela joaloka meriti e theang,

ke fefoloa joaloka tsie.

₂₄Mangoele a ka a tšèrèma,

a tšerema ke ho itima lijo,

'mele oa ka o otile

ke ho hloka mafura.

₂₅Ke fetohile sekhobo

ho baqosi ba ka,

ha ba mpona

ba ntšisinyetsa lihlooho.

₂₆Ak'u nthuse,

Morena Molimo oa ka,

u mpholose ka mohau oa hao,

₂₇ba tle ba tsebe

hore hona ho entsoe ke uena,

ke mosebetsi oa matsoho a hao,

matsoho a hao uena Morena.

₂₈Bona baa rōhakana,

empa uena ua hlohonolofatsa;

ba ntsohelang matla

ba ke ba hlajoe ke lihlong,

mohlanka oa hao

eena a ke a thabe.

₂₉Baqosi ba ka ba apareloe ke lihlong,

tlontlollo e be joaloka seaparo

seo ba ipōpileng ka sona.

₃₀Ke tla boka Morena

ka lentsoe le phefa,

ke mo rorise ke le har'a matšoele;

₃₁hobane o eme ka hlakoreng le letona,

hlakoreng le letona la mofutsana,

hore a tle a mo pholose

ho ba mo ahlōlang.