Thapelo ea ho ikōpela thuso
1Morena, u emela'ng hōle hakaalo?
U ipatela'ng
nakong ea matšoenyeho?
2Ea khopo oa ikhantša,
o befetse ea hlōphehileng;
a ke a tšoasoe
ke mano ao a a lōhileng.
3Ea khopo o ithorisa
ka merero ea hae e mebe,
ea meharo o rōhaka Morena,
oa mo nyelisa.
4Ea khopo o soenya linko, o re:
“Molimo ha a phetetse,
ha ho na Molimo.”
Ke phetho seo a se nahanang.
5Kamehla o atleha mererong ea hae,
likahlōlo tsa hao li mo phahametse,
lira tsa hae tsohle
o li talima maotong.
6Ka pelong ea hae o re:
“Nke ke ka sisinngoa ke letho,
nke ke ka hlaheloa ke bobe
le ka mohla.”
7Molomong oa hae ho tsoa litlhapa,
le mashano le bomènèmènè,
lelemeng la hae
ho maname bolotsana,
ho maname le bona bokhopo.
8O lula a laletse pel'a metsana,
o bolaea ba se nang molato,
o ba bolaea a ipatile.
Ka mahlo o tsoma ba tsielehileng,
9o lalla joaloka tau
e bothile selaong sa eona;
o lalla joalo
hore a tle a qhautse mohlōphehi,
a mo qhautse
ka ho mo tšoasa ka leraba la hae.
10Oa qachama, a batalle;
ea tsielehileng
a oele marōng a hae.
11Ka pelong ea khopo o re:
“Molimo oa lebala,
o ipatile sefahleho,
a ke ke a bona letho le khale.”
12Thusa, Morena! Oho, Molimo,
itokisetse ho otla;
u se ke ua lebala bahlōphehi.
13Ea khopo o nyelisetsa'ng Molimo,
ka pelong ea hae a re:
“A ke ke a phetetsa?”
14Athe uena u bona bomalimabe
le mahlomola;
ua li lemoha, 'me ua li laola.
Ea tsielehileng o tšepile uena,
ke uena mothusi oa likhutsana.
15Robokela ea khopo le e mobe,
u phetetse bokhopo ba hae,
bo fele tu!
16Morena ke khosi kamehla le mehla,
balichaba ba felile naheng ea hae.
17Morena, u utloile takatso
tsa ba eisehang,
u ba matlafatsa lipelo,
u ba sekehela tsebe,
18ho ahlōlela khutsana
le ea hatelloang,
hore motho oa lefatše
a se hlole a tšosa ba bang.
