Bohlale le bothoto
1Bohlale bo hahile ntlo ea bona,
ba hloma litšiea tsa eona,
ba li hloma li supile;
2ba hlaba likhomo, ba ritela veine,
tafoleng ea bona ba bea mapetle.
3Bo rōmme makhabunyane a bona
ho ea hōoa a le qhōoeng ea motse:
4“Bohle ba se nang tsebo
ba ke ba tle koano!”
Le ho ba hlokang kelello bo re:
5“Tloong le tl'o ja,
le itjelle lijo tsa ka,
le inoelle veine eo ke e ritetseng.
6Furallang ba se nang tsebo
le tle le phele,
le tsamaee tseleng ea kutloisiso.
7“Ea laeang mosomi
o ipiletsa mahlapa,
ea khalemang ea khopo
o ipiletsa ho tlontloloha.
8Se khaleme mosomi,
esere a u hloea,
khalema ea bohlale,
eena o tla u rata.
9Rupela mohlalefi
a tl'a hlalefe haholo,
u rute ea lokileng
a eketse thuto ea hae.
10“Ho tšaba Morena
ke qaleho ea bohlale,
ho tseba Ea Halalelang
ke eona kutloisiso.
11Ke ka 'na bohlale
tšiu tsa hao li tla anafala,
lemo tsa bophelo ba hao
li lelefatsoe.
12Haeba u le bohlale,
bohlale ba hao bo tla u putsa,
haeba u le mosomi,
molato e tla ba oa hao.”
13Bothoto bo ka mosali,
mosali ea lerata haholo:
Ha a tsebe letho, ke tseketseke.
14O kokomala monyako
oa ntlo ea hae,
tulong se beiloeng qhōoeng,
sa beoa qhōoeng ea motse.
15O emeletse ho bitsa,
ho bitsa bo-mofeta-ka-tsela,
ba ikelang ka tsela tsa bona.
16O re: “Kenang le mona
lōna ba se nang tsebo!”
O rialo ho ba hlokang kelello.
17“Metsi a utsuoang
a monate haholo,
qhoqha e jeloang sephiring
ea hlabosa!”
18Ea se nang tsebo ha a tsebe
hore lefu le laletse moo,
baeti ba mosali eo
ba feletse lebitleng.
