MAELE 2

₁Mora oa ka,

ha u ka mamela polelo tsa ka,

ua boloka litaelo tsa ka;

₂ua sekehela bohlale tsebe,

pelo ea hao ea labalabela

ho ba le kutloisiso;

₃ha u ka ipiletsa hore u be seli,

ua kōpa hore u be le kutloisiso;

₄ha u ka e batla

sa hoja u batla silefera,

ua e batla sa tlotlo e le patuoe;

₅kutloisiso ea ho tšaba Morena

u tla e fihlela,

ho tseba Molimo le hona

u ho fumane.

₆Ke Morena ea fanang ka bohlale,

tsebo le kutloisiso li tsoa ho eena.

₇O hlokomela metsamao

ea ba lokileng,

ke thèbè ho ba hlokang koli.

₈O baballa ba lokileng

tseleng tsa bona

batšepuoa ba hae a ba sireletse.

₉U tla utloisisa ho loka,

ho tšepeha, le ho nepahetseng,

u utloisise le litsela tsohle,

tsela tsohle tse lokileng;

₁₀hobane bohlale

bo tla kena pelong ea hao,

tsebo e be boithabiso,

boithabiso ba pelo ea hao.

₁₁U tla baballoa ke ho ba le kelello,

kutloisiso e u sireletse,

₁₂e u pholose tseleng tse khopo,

e u phemise ba buang tse mpe,

₁₃ba lahlang tsela tse lokileng,

ba tsamaeang tseleng tse lefifi.

₁₄Bona ba thabela ho etsa bobe,

ba thabela bokhopo ba ba khopo,

₁₅bao tsela tsa bona li khopameng,

metsamao ea bona e khelohileng.

₁₆U tla phemisoa mosali oa sehlola,

mosali ea èkang ka lipolelo,

₁₇ea sa tšepahaleng

ho monna oa hae,

ea lebalang

selekane sa Molimo oa hae.

₁₈Lapa la hae le khannela lefung,

tsela tsa hae le isa ho ba shoeleng.

₁₉Ba kenang lapeng leo

ha ba ke ba khutla,

le tsela ea bophelo ha ba e fumane.

₂₀Kahoo u tla tsamaea

tseleng ea ba lokileng,

u tsamaee tseleng ea ba hlokang koli.

₂₁Ba lokileng ba tla phela lefatšeng,

ba hlokang koli ba ahe ho lona.

₂₂Ba khopo ba tla felisoa lefatšeng,

mahlabaphieo a timetsoe ho lona.