1Ho molemo ho ba mofutsana
ea hlokang koli,
ho e-na le ho ba sethoto
se buang leshano.
2Ho cheseha motho a hloka tsebo
ha ho na thuso,
ho ba mahlahahlaha
ho lahlisa motho tsela.
3Bothoto ba motho
bo timetsa bophelo ba hae,
ka pelong ea hae
a korotlele Morena.
4Leruo le atisetsa motho metsoalle,
athe mofutsana
o furalloa le ke metsoalle.
5Paki ea bohata e tla ahlōloa,
ea buang leshano
a ke ke a phonyoha.
6Ba bangata ba qekisa
ho ratoa ke khosi,
bohle ke metsoalle
ea ea fanang limpho.
7Mofutsana o hlouoa le ke ba habo,
metsoalle ea hae
eona e mo khesa hakaakang!
Leha a re o ipiletsa ho bona,
ha ho moo a ba bonang teng.
8Ea ipatlelang bohlale
o rata bophelo ba hae,
ea nang le kelello,
katleho ke ea hae.
9Paki ea bohata e tla ahlōloa,
ea buang leshano o tla timela.
10Sethoto ha se lokele
ho hafa ka nkatana,
joalokaha lekhoba le sa lokele
ho busa mahosi.
11Bohlale ba motho
bo tsoala mamello,
ho iphapanyetsa liphoso
ke eona tlōtla ea hae.
12Khalefo ea khosi
e joaloka tau ha e puruma,
mohau oa eona
o joaloka phoka holim'a joang.
13Mora ea sethoto
o tlisetsa ntat'ae koluoa,
komang tsa mosali
li ka metsi a rothang ho-ea-ho-ile,
ha pula e na.
14Ntlo le maruo ke lefa
le fumanoang ho bo-ntat'a,
mosali ea bohlale
ke mpho ea Morena.
15Botsoa bo isa motho
le sephume sa boroko,
sekhōba sona se bolaoa ke tlala.
16Ea bolokang litaelo
o baballa bophelo ba hae,
ea sa hlokomeleng metsamao ea hae
o tla shoa.
17Ea hauhelang bafumanehi
o alima Morena,
seo a faneng ka sona
Morena o tla 'museletsa sona.
18Laea ngoana oa hao
u sa na le tšepo,
u se thohothelloe ho 'molaea.
19Motho ea halefang haholo
o tla otloa,
ha o mo pholosa
u tla boela u pheta hape.
20Sekehela keletso tsebe,
u mamele litaelo,
e le hore qetellong
u tle u hlalefe.
21Merero e mengata
ka pelong ea motho,
empa oa Morena
oona o hlola kamehla.
22Meharo e hlabisa motho lihlong;
ho molemo ho futsaneha
ho e-na le ho bua leshano.
23Ho tšaba Morena hoa phelisa,
ea nang le tšabo eo
o tla phela ka boiketlo,
bobe bo ke ke ba mo oela holimo.
24Tsoho la ea botsoa
le hanella ka sejaneng,
o tsoafa le ho le isa
ka hanong la hae.
25Shapa mosomi,
ea se nang tsebo a tle a hlalefe;
khalema ea hlalefileng,
eena o tla fumana tsebo.
26Ea shapang ntat'ae,
a phalalise 'm'ae,
ke ngoana ea hlabisang lihlong,
ea tlontlollang.
27Mora oa ka,
ha u ka khaotsa ho mamela litaelo
u tla kheloha lithuto tsa bohlale.
28Paki e khopo e bapala ka toka,
ea khopo bokhopo boa mo natefela.
29Basomi ba emetsoe ke kahlōlo,
mekokotlo ea lithoto
eona e emetsoe ke phafa.
