Paseka e ketekoa khetlo la bobeli
1Ka khoeli ea pele, selemong sa bobeli bana ba Iseraele ba tlohile naheng ea Egepeta, Morena a bua ho Moshe a le lehoatateng la Sinai, a re: 2“Bana ba Iseraele ba tla etsa mokete oa Paseka ka nako ea oona. 3Ka letsatsi la leshome le metso e mene la eona khoeli ena, ka phirimana, le tla etsa mokete oa Paseka ka nako ea oona. Le tla o etsa ho ea ka melao eohle ea oona, le ho ea ka litaelo tsohle tsa oona.” 4Moshe a bolella bana ba Iseraele hore ba etse mokete oa Paseka.
5Ka letsatsi la leshome le metso e mene, la khoeli ea pele, ka phirimana, bana ba Iseraele ba etsa mokete oa Paseka ba le lehoatateng la Sinai. Bana ba Iseraele ba etsa tsohle ho ea kamoo Morena a neng a laetse Moshe kateng.
6Ho ne ho le teng banna ba bang, ba neng ba e-na le sesila ka baka la ho ama setōpō sa motho e mong, ba ileng ba sitoa ho etsa mokete oa Paseka ka letsatsi leo. Eaba ba tla kapele ho Moshe le ho Arone ka lona letsatsi leo. 7Banna bao ba re ho Moshe: “Re sesila ka baka la setōpō sa motho e mong; ke ka baka la'ng re sa lumelloeng ho etsa nyehelo ea Morena, ka nako ea eona, 'moho le bana ba Iseraele?”
8Moshe a re ho bona: “Nkemeleng, nke ke utloe seo Morena a tla ntaela sona malebana le lōna.”
9Morena a bua ho Moshe, a re: 10“Bolella bana ba Iseraele, u re: ‘Haeba motho ofe kapa ofe oa lōna, kapa oa lelōko la lōna, a e-na le sesila ka baka la setōpō sa motho; kapa eba o leetong, hōle-hōle, o tla 'ne a etsetse Morena mokete oa Paseka. 11Ka letsatsi la leshome le metso e mene la khoeli ea bobeli, ka phirimana, ba tla etsa mokete oa Paseka, ba je le bohobe bo sa lomosoang, le moroho o babang. 12Ba se ke ba itšiela letho bakeng sa hosasane, ho se be le lesapo le rojoang. Ba tla o etsa ho ea ka melao eohle ea mokete oa Paseka. 13Empa ha motho a hloekile, a bile a se leetong, feela a sa etse mokete oa Paseka, motho eo o tla khaoloa sechabeng sa habo, hobane ha aa ka a etsetsa Morena mokete oa Paseka ka nako ea oona. Motho eo o tla jara sebe seo sa hae.
14“ ‘Ha mojaki ea jakileng har'a lōna a rata ho etsetsa Morena mokete oa Paseka, o tla o etsa ho ea ka taelo ea oona le ka molao oa oona; a o etse joalo. Le tla ba le molao o le mong bakeng sa mojaki le bakeng sa letsoalloa la naha’.”
Leru le kang mollo
15Ka letsatsi leo ba neng ba hloma Tente ea Morena ka lona, leru la e khurumetsa. Ka phirimana leru lena le ne le ee le ke khanare ea mollo holim'a Tente ea Morena, ho fihlela hoseng. 16Kamehla ho ne ho ee ho be joalo, leru le koahele Tente ea Morena, bosiu e be khanare ea mollo. 17Ha leru le ne le phahama ho tloha holim'a Tente, bana ba Iseraele ba ne ba ee ba tsoele pele leetong, 'me moo leru le theohelang holim'a Tente ea Morena ha ba le hona teng, ebe bana ba Iseraele ba hloma hona teng. 18Ka taelo ea Morena bana ba Iseraele ba ne ba ee ba tsoele pele leetong, 'me ka taelo ea Morena ba ne ba ee ba hlome. Ka matsatsi 'ohle ha leru le ntse le khurumelitse Tente ea Morena, ba ne ba ee ba lule liahelong.
19Leha leru le ne le ka khurumetsa Tente ea Morena ka matsatsi a mangata, bana ba Iseraele ba ne ba ee ba bōlōke taelo ea Morena, ba se ke ba tsoela pele leetong. 20Ka nako e 'ngoe leru le ne le ee le khurumetse Tente ea Morena ka matsatsi a seng makae; ka taelo ea Morena ba ne ba ee ba lule liahelong, 'me ka taelo ea Morena ebe ba tsoela pele leetong. 21Ka nako e 'ngoe leru le ne le ee le khurumetse Tente ea Morena ho tloha ka phirimana ho isa hoseng; ere ha leru le phahama hoseng, ebe ba tsoela pele leetong. Kapa haeba leru le phahama motšeare kapa bosiu, ebe ba tsoela pele leetong. 22Leha leru le ne le ka khurumetsa Tente ea Morena ka matsatsi a mabeli, kapa khoeli, kapa ho feta moo, 'me le itulela holim'a Tente ea Morena, bana ba Iseraele ba ne ba ee ba hlole liahelong, ba se ke ba tsoela pele leetong. Empa ha leru le ne le phahama, ba ne ba ee ba tsoele pele leetong. 23Ka taelo ea Morena, ba ne ba ee ba hlome, 'me ka taelo ea Morena ba tsoele pele leetong. Ba bōlōka taelo ea Morena, joalokaha a ne a ba laetse ka Moshe.
