LIPALO 8

₁Morena a bua ho Moshe, a re:

₂“Bua le Arone, u re ho eena: ‘Ha u hotetsa mabone, mabone ao a supileng a tla bonesa kapele ho seluloana.’ ”

₃Arone a etsa joalo, a hotetsa mabone hore a bonese kapele ho seluloana, joalokaha Morena a ne a laetse Moshe. ₄Seluloana se ne se entsoe ka khauta e thutsoeng; ho tloha lenonong la sona ho isa lipaleseng tsa sona, e ne e le ntho e le 'ngoe, e le mosebetsi o thutsoeng, ho ea ka setšoantšo seo Morena a neng a se bontšitse Moshe.

₅Morena a bua ho Moshe, a re: ₆“Ntša Balevi kahar'a bana ba Iseraele, u ba hloekise. ₇Ha u ba hloekisa, u ba etse tjena: U ba fōke ka metsi a tlhoekiso, ba ipeole 'mele oohle ka lehare, ba hlatsoe liaparo tsa bona, ba itlhoekise. ₈Ba nke pohoana le nyehelo ea eona ea phofo e thumisehileng, e lubiloeng ka ole; ebe le uena u nka pohoana e 'ngoe ea nyehelo e tlosang sebe. ₉U tlise Balevi kapele ho Tente ea Morena, ebe u bōkanya sechaba sohle sa bana ba Iseraele. ₁₀Joale u tlise Balevi kapele ho Morena, 'me bana ba Iseraele ba bee matsoho a bona holim'a Balevi. ₁₁Arone a nyehele ka Balevi kapele ho Morena, e le nyehelo e akhōtsoang, e tsoang ho bana ba Iseraele, hore Balevi ba tle ba sebeletse Morena.

₁₂“Balevi ba bee matsoho a bona holim'a lihlooho tsa lipohoana, ebe uena u nyehela ka pohoana e 'ngoe ho Morena e le nyehelo e tlosang sebe, 'me e 'ngoe e le nyehelo ea secheso ea ho etsetsa Balevi tefelo ea sebe. ₁₃U emise Balevi kapele ho Arone le bara ba hae, u nyehele ka bona ho Morena, e le nyehelo e akhōtsoang. ₁₄Ka mokhoa o joalo u tla khetha Balevi ho bana ba Iseraele, 'me Balevi e tla ba ba ka. ₁₅Kamora' moo, Balevi ba tla kena ka Tenteng ea Morena ho ea sebeletsa. U tla ba hloekisa, ebe u nyehela ka bona, e le nyehelo e akhōtsoang.

₁₆“Har'a bana ba Iseraele, Balevi ke ba ka ka ho tlala. Ke inketse bona bakeng sa matsibolo 'ohle a bana ba Iseraele. ₁₇Matsibolo 'ohle a bana ba Iseraele ke a ka, a batho le a liphoofolo. Ke ne ke ikhalalelletse 'ona ka letsatsi leo ka lona ke neng ke bolaee matsibolo 'ohle naheng ea Egepeta. ₁₈Ke nkile Balevi bakeng sa matsibolo 'ohle har'a bana ba Iseraele. ₁₉Har'a bana ba Iseraele, Balevi ke ba neile Arone le bara ba hae, hore Balevi ba tle ba sebeletse bana ba Iseraele ka Tenteng ea Morena, ba etsetse bana ba Iseraele tefelo ea sebe hore ho se tšohe ho e-ba le seoa har'a bana ba Iseraele, ha ba atamela Sehalalelong.”

₂₀Bo-Moshe, le Arone, le sechaba sohle sa bana ba Iseraele, ba etsa joalo ho Balevi. Ho ea ka tsohle tseo Morena a neng a li laetse Moshe, malebana le Balevi, bana ba Iseraele ba etsa Balevi joalo. ₂₁Balevi ba itlhoekisa, ba hlatsoa liaparo tsa bona, 'me Arone a nyehela ka bona kapele ho Morena e le nyehelo e akhōtsoang, 'me a ba etsetsa tefelo ea sebe ho ba hloekisa. ₂₂Kamora' moo, Balevi ba kena ka Tenteng ea Morena ho ea sebeletsa ba le tlas'a taolo ea Arone le bara ba hae. Joalokaha Morena a ne a laetse Moshe, malebana le Balevi, ba etsa Balevi joalo.

₂₃Morena a bua ho Moshe, a re: ₂₄“Ona ke molao ho Balevi: Ho tloha ka ba lilemo tse mashome a mabeli a metso e mehlano ho ea holimo, Balevi ba tla kena lenaneng la ba sebeletsang ka Tenteng ea Morena. ₂₅Empa ba lilemo tse mashome a mahlano ba tla tsoa lenaneng la ba sebeletsang, 'me ba ke ke ba hlola ba sebeletsa. ₂₆Feela ba ka 'na ba thusana le bana babo bona ka Tenteng ea Morena ho hlokomela tse sebelisoang, empa ha ba na ho sebeletsa. Balevi u tla ba etsa tjena, malebana le mosebetsi oa bona.”