Meeli ea naha ea Kanana
1Morena a bua ho Moshe, a re:
2“Laela bana ba Iseraele, 'me u re ho bona: ‘Ha le fihla naheng ea Kanana, ena ke eona naha eo e tla ba lefa la lōna, eona naha ea Kanana ho ea ka meeli ea eona.
3“ ‘Ka boroa moeli oa lōna o tla tloha lehoatateng la Sine, o ikhōhle ka moeli oa Edomo. O tla tloha ka bochabela moo Leoatle la Letsoai le fellang teng. 4Joale o tla thinyetsa ka boroa ho moepa oa Lekhalo la Akarabime, o fete Sine, o e'o fella ka boroa ho Kadeshe-Barenea; o lebe Hasara-Adare, 'me o e'o feta Asamone. 5Ho tloha Asamone moeli o tla thinyetsa molatsoaneng oa Egepeta, o e'o khaotsa ka Leoatle.
6“ ‘Ka bophirimela moeli oa lōna e tla ba Leoatle le Leholo, le lebōpo la lona. Ona e tla ba oona moeli oa lōna ka bophirimela.
7“ ‘Ka leboea moeli oa lōna e tla ba ona: le tla o seha ho tloha Leoatleng le Leholo, ho ea fihla Thabeng ea Hore; 8ho tloha Thabeng ea Hore le tla o seha ho ea fihla lekhalong la Hamate, 'me o e'o fella Sedade. 9Ho tloha moo moeli o tla fetela Siferone o e'o fella Hasere-Enane. Ona e tla ba oona moeli oa lōna ka leboea.
10“ ‘Ka bochabela le tla seha moeli oa lōna ho tloha Hasere-Enane ho ea fihla Shefame. 11Moeli o tla theosa ho tloha Shefame ho ea fihla Ribela, ka bochabela ho Aine; ebe o theosa o ikhōhlile ka lebōpo le ka bochabela la letša la Kinerete. 12Moeli o tla sika ka Jorodane, o be o e'o fella Leoatleng la Letsoai.
“ ‘Ena e tla ba eona naha ea lōna le meeli e e pota-potileng.’ ”
13Moshe a laela bana ba Iseraele, a re: “Ena ke eona naha eo le tla e arolelana ka lōtho, hore e be lefa la lōna; eo Morena a laetseng hore e neoe merabe e robong, le karolo e 'ngoe ea morabe oa Manase. 14Morabe oa bana ba Rubene ho ea ka matlo a bo-ntat'a bona, le morabe oa bana ba Gade ho ea ka matlo a bo-ntat'a bona, le karolo e 'ngoe ea morabe oa Manase, bona ba se ba neiloe lefa la bona. 15Merabe ena e 'meli, le karolo ea morabe oa Manase, eona e se e neiloe lefa la eona ka koano ho Jorodane, malebana le Jeriko, ka bochabela.”
Mahosana a ikarabellang kabong ea naha
16Morena a bua ho Moshe, a re: 17“Ana ke mabitso a bana ba tla le arolela naha, hore e be lefa la lōna: moprista Eleasare le Joshua, mora oa Nune. 18Morabeng o mong le o mong u tla nka khosana e le 'ngoe ho arola naha, hore e be lefa. 19Ana ke mabitso a banna bao:
“Morabeng oa Juda e be Kalebe, mora oa Jefune; 20morabeng oa bana ba Simeone e be Shemuele, mora oa Amihude; 21morabeng oa Benjamine e be Eledade, mora oa Kiselone; 22morabeng oa bana ba Dane e be khosana Buki, mora oa Jogele. 23Ho bana ba Josefa: morabeng oa bana ba Manase e be khosana Haniele, mora oa Efode. 24Morabeng oa bana ba Efraime e be khosana Kemuele, mora oa Shifetane; 25morabeng oa bana ba Sebulone e be khosana Elesafane, mora oa Paranake; 26morabeng oa bana ba Isakare e be khosana Paletiele, mora oa Asane; 27morabeng oa bana ba Ashere e be khosana Ahihude, mora oa Shelomi; 28morabeng oa bana ba Nafthali e be khosana Pedahele, mora oa Amihude.”
29Bana ke bona bana bao Morena a ileng a ba laela hore ba arolele bana ba Iseraele lefa, naheng ea Kanana.
