1Ha Bileame a bona hore ho thabisa Morena ho hlohonolofatsa Iseraele, ha a ka a hlola a ea batla tsa boloi joaloka pele, empa a talima lehoatateng. 2Ha a phahamisa mahlo, a bona Baiseraele ba hlomile ho ea ka melōko ea bona. Moea oa Molimo oa mo fihlela, 3'me a porofeta, a re:
“Bileame, mora oa Beore,
o porofeta tjena,
ho porofeta monna
ea mahlo a chatsi,
4ho porofeta monna
ea utloang lentsoe la Molimo,
ea bonang lipono
tsa Ea Matla 'ohle,
ea oelang fatše
mahlo a hae a ntse a bona.
5“Litente tsa hao, Jakobo,
li khahleha hakaakang!
Liahelo tsa hao, Iseraele,
li ntle hakaakang!
6“Li nametse hōle joaloka likhohlo,
joaloka masimo
mabōpong a linōka,
joaloka makhala
a hlomiloeng ke Morena,
joaloka fate tsa likedare pel'a metsi!
7Metsi a phalla linkhong tsa hao,
peō ea hae
e tla ba metsing a mangata,
khosi ea hae
e tla ba khōlo ho feta Akake,
'muso oa hae o tla phahamisoa.
8“Molimo ea mo ntšitseng Egepeta,
o matla joaloka nare.
O tla hlōha lichaba,
e leng lira tsa hae,
a bjabjaretse masapo a tsona,
a ba bolaee ka metsu
ea liqha tsa hae.
9A borame, a qachame joaloka tau,
le joaloka tauhali.
Ke mang ea tla mo tsosa?
“Ea u hlohonolofatsang
a hlohonolofatsoe,
ea u rohakang a rohakoe!”
10Balake a halefela Bileame haholo, 'me a opa liatla tsa hae, a re ho Bileame: “Ke u bitselitse hore u tl'o rōhaka lira tsa ka, empa bona, u bile u li hlohonolofalitse ka makhetlo a mararo! 11Joale he, balehela haeno. Ke ne ke hopotse hore ke tla u hlompha haholo, empa ke mona Morena o u timme hlompho eo.”
12Bileame a re ho Balake: “Na ha kea ka ka bolella maqosa ao u neng u a rōmile, ka re: 13‘Leha Balake a ka mpha ntlo ea hae e tletse silefera le khauta, nke ke ka tlōla taelo ea Morena ka ho etsa ho lokileng kapa ho hobe, ke tla bua feela seo Morena a reng ke se bue’?
Bileame o porofeta la ho qetela
14“Joale bona, ke ea sechabeng sa heso. A nke ke u hlokomelise seo sechaba sa heso se tla se etsa sechaba sa hao ka matsatsi a tlang.” 15Bileame a porofeta, a re:
“Bileame, mora oa Beore,
o porofeta tjena,
monna ea mahlo a chatsi
oa porofeta;
16ho porofeta monna
ea utloang lentsoe la Molimo,
ea nang le tsebo
ea Ea Holimo-limo;
ea bonang lipono
tsa Ea Matla 'ohle,
ea oelang fatše
mahlo a hae a ntse a bona.
17“Kea 'mona,
empa e seng hona joale,
kea 'moha,
empa a se haufi le 'na:
Ho tla ropoha naleli
e e-tsoa ho Jakobo,
ho phahame lere la puso
le e-tsoa ho Iseraele;
le tla hlathaka bohle ba Moabe,
le ripitle bana bohle ba Sheke.
18O tla hapa Edomo, a e rue,
Seire, sera sa hae,
le eona o tla e rua.
Iseraele o tla 'ne a matlafale,
19Jakobo o busa lira tsa hae,
'me o timetsa masalla a motseng.”
20Bileame a talima Baamaleke, 'me a porofeta, a re:
“Amaleke
sechaba sa pele har'a lichaba,
empa qetellong se tla timella ruri.”
21A talima Bakene, 'me a porofeta, a re:
“Leaho la hao
ke qhobosheane e thata,
sehlaha sa hao
se hahiloe holim'a lefika;
22leha ho le joalo, lōna Bakene,
le tla timetsoa,
Asure e tla le hapa,
le be bathōpuoa.”
23Bileame a porofeta hape, a re:
“Jo! ke mang ea ka phelang
ha Molimo a etsa tjee?
24Empa likepe
li tla tsoa lebōpong la Kitime,
li siee Asure le Ebere e le lesupi,
empa qetellong
le tsona li tla timela.”
25Bileame a ema, a tsamaea, a khutlela ha habo. Balake le eena a ikela ka tsela ea hae.
