Melao ea mahlabelo
1Morena a bua ho Moshe, a re:
2“Bua le bana ba Iseraele, u re: ‘Ha le fihla naheng eo le tla aha ho eona, eo ke le neang eona, 3le nyehelle Morena ka nyehelo ea mollo, e leng nyehelo ea secheso, kapa sehlabelo sa ho etsa kano, kapa nyehelo ea boithaopo, kapa ea mekete ea lōna e khethehileng, e le nyehelo e monko o monate, e amohelehang ho Morena, e tsoang mohlapeng oa likhomo kapa oa linku. 4Joale ea nyehellang Morena a be a tlise le nyehelo ea lijo, ea phofo e thumisehileng, e boima ba kilo e le 'ngoe, e lubiloeng ka ole e etsang lethara e le 'ngoe; 5le veine e etsang lethara e le 'ngoe, e le nyehelo ea seno. Nyehelo ena u tla nyehela ka eona 'moho le nyehelo ea secheso, kapa sehlabelo bakeng sa konyana e 'ngoe le e 'ngoe.
6“ ‘Kapa bakeng sa pheleu u tla nyehela ka nyehelo ea lijo, ea phofo e thumisehileng, e boima ba kilo tse peli; phofo ena e be e lubiloeng ka ole e etsang lethara e le 'ngoe le halofo. 7Bakeng sa nyehelo ea seno u nyehele ka veine e etsang lethara e le 'ngoe le halofo, e be e monko o monate, e amohelehang ho Morena.
8“ ‘Ha u nyehela ka pohoana e le nyehelo ea secheso, kapa e le sehlabelo, kapa e le ea ho etsa kano, kapa e le nyehelo ea teboho e nyehelloang Morena; 9u tla nyehela ka nyehelo ea pohoana 'moho le nyehelo ea lijo. E be phofo e boima ba kilo tse tharo, e thumisehileng, e lubiloeng ka lethara tse peli tsa ole. 10Bakeng sa nyehelo ea seno u nyehele ea seno u nyehele ka veine etsang lilethara tse peli, e le nyehelo ea secheso e monko o monate, e amohelehang ho Morena.
11“ ‘U etse joalo ka pohoana e 'ngoe le e 'ngoe, kapa ka pheleu e 'ngoe le e 'ngoe, kapa ka konyana e 'ngoe le e 'ngoe, kapa ka potsanyane e 'ngoe le e 'ngoe. 12Ho ea ka palo ea liphoofolo tseo u nyehelang ka tsona, le tla etsa joalo ka e 'ngoe le e 'ngoe ho latela palo ea tsona.
13“ ‘Letsoalloa le leng le le leng la naha le tla etsa lintho tsena ka mokhoa ona, ha le nyehela ka nyehelo ea mollo e monko o monate, e amohelehang ho Morena. 14Haeba mojaki ea jakileng har'a lōna, kapa mang kapa mang ea jakileng har'a lōna melōkong ea lōna, a rata ho nyehella Morena ka nyehelo ea mollo e monko o monate, e amohelehang ho Morena, o tla etsa joalokaha le etsa. 15Ho tla ba le molao o le mong ho sechaba, le ho mojaki ea jakileng har'a lōna. Ona ke molao oa mehla eohle melōkong ea lōna. Seo le leng sona, le mojaki o tla ba sona kapele ho Morena. 16Molao o tla ba mong, le taelo e tla ba 'ngoe ho lōna le ho mojaki ea jakileng har'a lōna.’ ”
17Morena a bua ho Moshe, a re: 18“Bua le bana ba Iseraele, u re ho bona: ‘Ha le fihla naheng eo ke le isang ho eona, 19e tle ere ha le e-ja lijo tsa naha eo, le nyehelle Morena ka nyehelo e phahamisoang. 20Ka bohobe bo entsoeng ka koro ea lilopotsiea, u tla nyehella Morena, e le nyehelo e akhōtsoang. U tla e phahamisa joalokaha u etsa ka nyehelo e akhōtsoang e tsoang seotlong. 21Melōkong eohle ea lōna le tla nyehella Morena ka hlama ea lilopotšiea tsa koro, e le nyehelo e akhōtsoang.
Linyehelo tse tlosang sebe
22“ ‘Ha le etsa phoso, 'me le sa bōlōke melao ena eohle eo Morena a e boleletseng Moshe; 23esita le tsohle tseo Morena a le laetseng tsona ka Moshe, ho tloha mohl'a Morena a le laelang ho ea fihla melōkong ea lōna; 24haeba sechaba se etsa phoso e se ka morero, sechaba sohle se tla nyehela ka pohoana e le nyehelo ea secheso, e monko o monate, e amohelehang ho Morena. Sechaba se tla nyehela le ka nyehelo ea lijo e tsamaeang le nyehelo ea pohoana, le ka nyehelo ea seno e tsamaeang le eona, ho ea ka taelo. Le nyehele le ka phooko e le 'ngoe e le nyehelo e tlosang sebe. 25Moprista o tla etsetsa sechaba sohle sa bana ba Iseraele tefelo ea sebe, 'me ba tla tšoareloa, hobane ba entse phoso, 'me bo tlisitse nyehelo ea mollo ho Morena, le nyehelo e tlosang sebe, ka baka la phoso ea bona. 26Sechaba sohle sa bana ba Iseraele se tla tšoareloa, 'moho le mojaki ea jakileng har'a sona, hobane ho entsoe phoso.
27“ ‘Haeba e mong a etsa sebe e se ka morero, o tla nyehela ka pōli e tšehali, e nang le selemo, e le nyehelo e tlosang sebe. 28Moprista o tla etsetsa motho eo ea entseng sebe e se ka morero tefelo ea sebe kapele ho Morena; o tla mo etsetsa tefelo ea sebe, 'me o tla tšoareloa. 29Ho ea etsang sebe e se ka morero, ho tla ba le molao o le mong ho letsoalloa la naha, le ho mojaki ea jakileng har'a lōna.
30“ ‘Empa motho ea tlōlang molao ka boomo, e ka ba letsoalloa la naha kapa mojaki, eo o nyefola Morena, 'me o tla khaoloa sechabeng sa habo. 31Motho eo o nyelisitse lentsoe la Morena, o tlōtse molao oa hae, 'me eka khona a khaoloe ho hang, a jare bokhopo ba hae.’ ”
Monna ea tlotseng molao oa Sabatha
32Ha bana ba Iseraele ba sa le lehoatateng, ba fumana motho a ntse a roalla patsi ka letsatsi la Sabatha. 33Ba mo fumaneng a ntse a roalla patsi ba mo tlisa ho Moshe, le ho Arone, le ho sechaba sohle. 34Ba mo kenya chankaneng, hobane ho ne ho e-s'o boleloe hore na a etsoe joang. 35Morena a re ho Moshe: “Ruri motho eo a bolaoe. Sechaba sohle se mo tlepeletse kantle ho liahelo, ka majoe.” 36Eaba sechaba sohle se mo ntšetsa kantle ho liahelo, se mo tlepetsa ka majoe, a ba a shoa joalokaha Morena a ne a laetse Moshe.
Taelo ea ho etsa litjellane liaparong
37Morena a bua ho Moshe, a re: 38“Bua le bana ba Iseraele, u re ho bona ba iketsetse litjellane liqoleng tsa liaparo tsa bona, melōkong eohle ea bona, 'me holim'a tjellane e 'ngoe le e 'ngoe e qoleng ea seaparo ho rōkelloe khoele e putsoa. 39Ha le bona litjellane tsena le tla hopola melao eohle ea Morena, 'me le e phethe. Le se ke la phetha litakatso tsa lipelo tsa lōna le tsa mahlo a lōna, e leng tse etsang hore le se ke la tšepahala. 40Ka mokhoa o joalo, hopolang melao ea ka eohle, le e phethe, 'me le tla halalela ho Molimo oa lōna. 41Ke 'na Morena Molimo oa lōna, ea le ntšitseng naheng ea Egepeta, hore ke be Molimo oa lōna. Ke 'na Morena Molimo oa lōna.”
