Lefufa la Arone le Meriama
1Meriama le Arone ba bua hampe ka Moshe, ka baka la mosali oa Mokushe eo a neng a mo nyetse, hobane o ne a nyetse mosali oa Mokushe. 2Ba re: “Na Morena o fela a buile ka molomo oa Moshe? Na ha a e-s'o bue ka melomo ea rōna?” Morena a utloa taba ena.
3Moshe e ne e le motho ea mosa haholo ho feta batho bohle ba kileng ba phela lefatšeng.
4Hang-hang Morena a bua ho Moshe, le ho Arone, le ho Meriama, a re: “Lōna ba bararo tloong ka Tenteng ea Morena!” Boraro ba bona ba tla ka Tenteng ea Morena. 5Morena a theoha a le kahar'a leru le lopaletseng, a ema monyakong oa Tente, a bitsa Arone le Meriama, 'me bobeli ba bona ba tla. 6Morena a re ho bona:
“Joale utloang mantsoe a ka:
Haeba ho na le moporofeta
har'a lōna,
'na, Morena,
ke tla itsebisa eena ka pono,
ke tla bua le eena ka toro.
7Ho mohlanka oa ka Moshe
ha ho joalo;
ka tlung ea ka eohle oa tšepahala.
8Ke bua le eena re talimane,
ke bua ka puo e hlakileng,
e seng ka lilōtho,
eena o bona sebōpeho sa ka.
Ke ka baka la'ng
ha le sa tšabe ho bua,
le sa tšabe ho bua Moshe,
mohlanka oa ka, hampe?”
Meriama o otloa ka lepera
9Khalefo ea Morena ea tlōkōma, eaba oa tsamaea.
10Leru la phahama holim'a Tente ea Morena, Meriama a sala a se a tletse lepera, a le mosoeu joaloka lehloa. Ha Arone a retelehela ka ho Meriama, a bona a se a tletse lepera. 11Arone a re ho Moshe: “Oho, moren'a ka, se ke ua re jarisa sebe, kea u rapela, hobane re entse ka bothoto, 'me re entse sebe. 12Meriama a se ke a ba joaloka sefolotsana se tsoang pōpelong ea 'm'a sona, linama tse ling tsa sona li jeehile.”
13Moshe a ipiletsa ho Morena, a re: “Oho, Molimo, kea u rapela! Ak'u mo folise hle!”
14Eaba Morena o re ho Moshe: “Haeba ntat'ae a ne a ka mo tšoela ka mathe sefahlehong, na o ne a ke ke a ba lihlong ka matsatsi a supileng? Mo koalle kathōko ho liahelo ka matsatsi a supileng, 'me kamora' moo le mo tlise liahelong hape.”
15Meriama a koalloa kathōko ho liahelo ka matsatsi a supileng, 'me sechaba ha sea ka sa tsoela pele leetong ho fihlela Meriama a khutlisetsoa liahelong hape. 16Kamora' moo sechaba sa tsoela pele leetong, ho tloha Haserote, 'me sa fihla sa hloma liahelo lehoatateng la Parane.
