LIPALO 11

₁Sechaba sa korotla haholo moo Morena a ntseng a utloa. Ha Morena a utloa, bohale ba hae ba tlōkōma, mollo oa Morena oa se laimela, oa chesa meeli ea liahelo lore! ₂Sechaba sa llela Moshe, eaba Moshe o rapela Morena, 'me mollo oa kokobela. ₃Sebaka seo ba se rea lebitso la Tabera, hobane ke moo mollo oa Morena o neng o tuke har'a bona.

₄Letšoelehali la balichaba le neng le tsamaea le Baiseraele la lakatsa nama haholo. Bana ba Iseraele le bona ba boela ba lla, ba re: “Ke mang ea tla re fa nama, hore re je? ₅Re hopotse litlhapi tseo re neng re li ja ha re sa le Egepeta, re sa li reke; le mokopu, le mahapu, le lishaloto, le eiee, le konofolo. ₆Re feletsoe ke matla! Ha ho na letho ho hang, haese manna ana ao re a bonang!”

₇Manna a ne a tšoana le peō e tšoeunyana, sebōpeho sa 'ona se tšoana le sa mamina a lifate a monko o monate. ₈Sechaba se ne se ee se tsamaee hohle, se a bōkelle, se a sile ka leloala, kapa se a tulele lefulung, se a phehe ka lipitsa, se etse maqebekoane. A ne a latsoeha joaloka moqathane o phehiloeng ka ole. ₉Ha phoka e ne e lala liahelong bosiu, manna a ne a lala le eona.

₁₀Moshe a utloa sechaba se lla hohle, malapeng a sona, motho ka mong a lla a le monyakong oa tente ea hae. Khalefo ea Morena ea tlōkōma haholo, 'me Moshe a soaba haholo. ₁₁Eaba Moshe o re ho Morena: “Ke ka baka la'ng ha u entse mohlanka oa hao tjee? Ke ka baka la'ng ha u sa nkhauhele, u mpelesitse mojaro oa sechaba see sohle? ₁₂Na ke 'na ea emotseng sechaba see sohle? Na ke 'na ea se tsoetseng, ha u re ho 'na: ‘Ba sike sefubeng sa hao, joalokaha mohōlisi a sika lesea, u ba ise naheng eo ke e hlapanyelitseng bo-ntat'a bona’? ₁₃Nama ea ho fepa sechaba see sohle ke tla e fumana kae? Sea ntelela, se re: ‘Re fe nama, re je!’ ₁₄Ke sitoa ho jara sechaba sena sohle ke le mong, hobane se nkimela haholo. ₁₅Haeba u nketsa tjena, hl'u mpolaee hona joale, kea u rapela, haeba u nkhauhetse, e le hore ke se ke ka bona bomalimabe ba ka.”

₁₆Morena a re ho Moshe: “Ntlisetse banna ba mashome a supileng, bao e leng baholo ba sechaba sa Iseraele, bao u tsebang hore ke baholo le baokameli ba sechaba sa Iseraele. U ba tlise ka Tenteng ea Morena, ba eme teng hammoho le uena. ₁₇Ke tla theohela teng, ke bue le uena. Ke tla nka karolo e 'ngoe ea moea o ho uena, ke ba abele eona. Ba tla jarisana mojaro oa sechaba sena le uena, hore u se ke ua o jara u le mong.

₁₈“U tle u re ho sechaba: ‘Itlhoekisetseng letsatsi la hosasane, 'me le tla ja nama, hobane Morena o utloile le lla, le re: Ke mang ea tla re fa nama, hore re je? Re ne re phela hamonate Egepeta! Ka baka leo, Morena o tla le fa nama, 'me le tla ja. ₁₉Ha le ka ke la e ja ka tsatsi le le leng, kapa ka matsatsi a mabeli, kapa ka matsatsi a leshome, kapa ka matsatsi a mashome a mabeli, ₂₀empa le tla e ja khoeli kaofela, ho fihlela e e-tsoa ka linko, e ba e le tena, hobane le lahlile Morena ea ntseng a le har'a lōna, la ba la lla kapele ho eena, la re: Ke ka baka la'ng re ileng ra tloha Egepeta?’ ”

₂₁Moshe a re: “Batho ba litaaso bao ke nang le bona ke likete tse makholo a tšeletseng, empa u re: ‘Ke tla ba fa nama eo ba tla e ja khoeli kaofela!’ ₂₂Na ba tla hlabeloa mehlape ea linku le ea likhomo hore e ba lekane? Kapa ebe ba tla tšoasetsoa litlhapi tsohle tsa leoatle, hore li tle li ba lekane?”

₂₃Eaba Morena o re ho Moshe: “Na ho na le se ka sitang Morena? Joale u tla bona hore na lentsoe la ka le tla phethahala kapa che.”

₂₄Moshe a tsoa, a bolella sechaba mantsoe a Morena. A phutha banna ba mashome a supileng ba bao e leng baholo ba sechaba, a ba emisa ho pota-pota Tente ea Morena. ₂₅Eaba Morena o theoha a le lerung o bua ho Moshe. A nka karolo e 'ngoe ea Moea o ho Moshe, a e abela banna ba mashome a supileng, bao e leng baholo. Eitse ha Moea o lula holim'a bona, ba porofeta, empa ba ba ba khaotsa.

₂₆Empa banna ba babeli ba ne ba setse liahelong. Lebitso la e mong oa bona e ne e le Eledade, la e mong e le Medade. Le bona Moea o ile oa lula holim'a bona. E ne e le ba bang ba ba neng ba ngotsoe bukeng, empa bona ba sa ka ba ea ka Tenteng ea Morena; eaba bona ba porofeta ba le liahelong. ₂₇Mohlankanyana a matha, a bolella Moshe, a re: “Bo-Eledade le Medade ba ntse ba porofeta ka liahelong!”

₂₈Eaba ho bua Joshua, mora oa Nune, lehlahana la Moshe, e leng e mong oa banna ba hae ba khethiloeng, o re: “Moshe, mong'a ka, ba thibele!”

₂₉Empa Moshe a re ho eena: “Na u nchoela mōna? Eka batho bohle ba Morena e ka be e le baporofeta, Morena a theolele Moea oa hae holim'a bona.” ₃₀Eaba Moshe le baholo ba Iseraele ba khutlela liahelong.

₃₁Ha tsoha moea o tsoang ho Morena, oa tlisa likoekoe tse tsoang leoatleng; oa li hasanya liahelong, le ho pota-pota. Bonamo ba sebaka seo li neng li se koahetse, ho tloha mahlakoreng 'ohle a liahelo, e ne e le sa leeto la letsatsi ho tloha liahelong; li ne li fofa, li phahametse lefatše ka bophahamo bo ka etsang methara e le 'ngoe. ₃₂Sechaba sa ema ka maoto letsatsi leo lohle, le bosiu bohle, le ka letsatsi lohle le latelang, sa bōkella likoekoe. Ea neng a bōkeletse hanyenyane o ne a bōkeletse tse ka bang boima ba likilo tse sekete. Ba li bèka lihoapa, ba li aneha ho pota-pota liahelo. ₃₃Eare ba sa ntse ba lōmme nama, ba e-s'o e hlafune le ho e hlafuna, khalefo ea Morena ea ba laimela, Morena a otla sechaba ka seoa se tšabehang.

₃₄Sebaka seo ba se rea lebitso la Mabitla a Meharo, hobane ke moo batho ba meharo ba neng ba epeloe teng. ₃₅Sechaba sa tsoela pele leetong ho tloha Mabitleng a Meharo, ho ea fihla Haserote, eaba se emisa teng.