1Sechaba sohle sa khōbōkana lebaleng le pel'a Monyako oa Metsi, se le khopolo e le 'ngoe. Sa re ho Esera, eo e neng e le Setsebi sa Molao, a tlise Buka ea Molao oa Moshe, oo Morena a neng a o beele bana ba Iseraele.
2Ka letsatsi la pele la khoeli ea bosupa, moprista Esera a tlisa Molao kapele ho sechaba sa banna, le basali, le bohle ba nang le kutloisiso. 3A o balla banna, le basali, le batho ba nang le kutloisiso; a o bala ho tloha hoseng ho fihlela motšeare o moholo, a le lebaleng le pel'a Monyako oa Metsi. Sechaba sohle sa mamela ka hloko tse baloang Bukeng ea Molao.
4Esera, eo e neng e le Setsebi sa Molao o ne a eme holim'a sethala se entsoeng ka lehong, se etselitsoe morero oo. Ka letsohong le letona la hae, ho ne ho eme Matiteea, le Shema, le Anaea, le Uriea, le Hilekiea, le Maasiea; ka letsohong la hae le letšehali ho eme Pedaea, le Mishaele, le Malakiea, le Hashume, le Hashebadana, le Sekariea, le Meshulame.
5Joale Esera a phetla Buka moo sechaba sohle se ntseng se 'mona, hobane o ne a eme moo a neng a se phahametse. Eitse ha a e phetla, sechaba sohle sa raoha! 6Esera a rorisa Morena Molimo e moholo, 'me sechaba sohle sa araba se phahamiselitse matsoho a sona holimo, sa re: “A ho be joalo! A ho be joalo!” Sa inamisetsa lihlooho tsa sona fatše, sa rapela Morena.
7Bo-Jeshua, le Bani, le Sherebiea, le Jamine, le Akube, le Shabetai, le Hodiea, le Maasiea, le Keleta, le Asariea, le Josabada, le Hanane, le Pelaea, e leng Balevi, ba hlalosetsa sechaba Molao, sechaba sona se ntse se eme litulong tsa sona. 8Ba bala Bukeng ea Molao oa Molimo ka mokhoa o hlakileng, ba hlalosa Molao, ba etsa hore sechaba se utloisise se baloang.
9Nehemia, eo e neng e le 'musisi oa naha, le Esera, eo e neng e le moprista e bile e le setsebi sa Molao, le Balevi ba neng ba ruta sechaba, ba re ho sechaba sohle: “Letsatsi lena ke le halalelang ho Morena Molimo oa lōna; le se ke la hlomoha, kapa la lla.” Ke hobane sechaba sohle se ne se ntse se lla ha se utloa se boleloang ke Molao.
10Nehemia a re ho sona: “Itsamaeleng, le e'o ja lijo tse monate, le noe tse mapholi, 'me le abele ba hlokang, hobane letsatsi lena ke le halalelang ho Morena oa rōna. Le se ke la soaba, hobane thabo ea Morena ke eona e tla le matlafatsa.”
11Balevi ba khutsisa sechaba sohle, ba re: “Khutsang, le se ke la hlomoha, hobane letsatsi lena lea halalela.”
12Eaba sechaba sohle sea itsamaela; sa ea ja, sa ea noa, sa abela ba hlokang. Sa nyakalla haholo, hobane se ne se utloisisitse seo se se boleletsoeng.
Mokete oa Maphèphè
13Ka letsatsi la bobeli lihlooho tsa malapa 'ohle a sechaba, le baprista, le Balevi, ba khōbōkanela ho Esera, eo e neng e le setsebi sa Molao, hore ba e'o ithuta se boleloang ke Molao. 14Ba fumana hore Molaong oo Morena a ileng a laela Moshe ho ba beela oona, ho ngotsoe hore ka mokete oa khoeli ea bosupa bana ba Iseraele ba lule maphèphèng, 15le hore ba hlabe mokhosi, ba phatlalatse metseng eohle ea bona, le Jerusalema, ba re: “Nyolohelang thabeng, le rèmè makala a mohloaare oo litholoana tsa oona li etsang ole, le a mohloaare oa naha, le makala a mohlakola, le makala a lipalema, le makala a lifate tse mahlaku a teteaneng, ho tla etsa maphèphè joalokaha ho ngotsoe.”
16Eaba sechaba sea ea, se tla le makala ao. Sa iketsetsa maphèphè; batho ba iketsetsa maphèphè kaholim'a marulelo a matlo a bona, le ka mabaleng a bona, le ka mabaleng a Tempele ea Molimo, le lebaleng la Monyako oa Metsi, le lebaleng la Monyako oa Efraime. 17Sechaba sohle sa batho ba neng ba e-tsoa bothōpuoeng sa iketsetsa maphèphè, sa lula ho 'ona. Ho tloha mehleng ea Joshua, mora oa Nune, ho fihlela ka letsatsi leo, bana ba Iseraele ba ne ba e-s'o ka ba etsa joalo, 'me ba thaba haholo.
18Ka letsatsi le leng le le leng, ho tloha ka letsatsi la pele, ho fihlela ka letsatsi la ho qetela, Esera a 'na a bala Buka ea Molao oa Molimo. Sechaba sa keteka mokete oo ka matsatsi a supileng, 'me ka letsatsi la borobeli ea e-ba phutheho e halalelang, ho ea ka Molao.
