1Batho ba ileng ba tiisa selekane ka ho ngola mabitso a bona e ne e le 'musisi Nehemia, mora oa Hakaleea, le baprista bana: Sedekiea, 2le Seraea, le Asariea, le Jeremia, 3le Pashahure, le Amariea, le Malakiea, 4le Hatushe, le Shebaniea, le Malōke, 5le Harime, le Meremote, le Obadiea, 6le Daniele, le Ginetone, le Baruke, 7le Meshulame, le Abiea, le Miamine, 8le Maasiea, le Bilegai, le Shemaea.
9Balevi bona e ne e le bo-Jeshua, mora oa Aseneea, le Binui, e mong oa bara ba Henadade, le Kademiele, 10le bana babo bona, e leng bo-Shebaniea, le Hodiea, le Keleta, le Pelaea, le Hanane, 11le 'Mika, le Rehobe, le Hashabiea, 12le Sakure, le Sherebiea, le Shebaniea, 13le Hodiea, le Bani, le Beninu.
14Baetapele ba sechaba bona e ne e le Paroshe, le Pahate-Moabe, le Elame, le Satu, le Bani, 15le Buni, le Asegade, le Bebai, 16le Adoniea, le Bigifai, le Adine, 17le Atere, le Hisekiea, le Asure, 18le Hodiea, le Hashume, le Besai, 19le Harife, le Anatotiea, le Nebai, 20le Magepiashe, le Meshulame, le Hesire, 21le Meshesabele, le Sadoke, le Jadua, 22le Pelatiea, le Hanane, le Anaea, 23le Hoshea, le Hananiea, le Hashube; 24le Haloheshe, le Pileha, le Shobeke, 25le Rehume, le Hashabena, le Maasiea, 26le Ahiea, le Hanane, le Anane, 27le Malōke, le Harime, le Baana.
28Sechaba sohle, le baprista, le Balevi, le balebeli ba menyako, le libini, le basebeletsi ba Tempele, bohle bao ka baka la Molao oa Molimo ba ileng ba ikhetholla ho baahi ba linaha tseo, le basali ba bona, le bara ba bona, le barali ba bona, e leng bohle ba nang le kutloisiso, 29ba ikopanya le bana babo bona, le mahosana a bona, ba hlapanya hore, haeba ba ke ke ba latela Molao oa Molimo, oo ba o neiloeng ke Moshe, mohlanka oa Molimo, ba rōhakehe. Ba hlapanya le hore ba tla bōlōka, 'me ba phethe melao eohle ea Morena Molimo oa bona, le likahlōlo tsa hae, le litaelo tsa hae.
30Sechaba sa hlapanya, sa re: “Re ke ke ra nyallana le balichaba.
31“Haeba balichaba ba ka tlisa lintho tseo ba li rekisang, kapa lijo, ka tsatsi la Sabatha, kapa ka letsatsi lefe le lefe le halalelang, re ke ke ra li reka, 'me ka selemo sa bosupa masimo a rōna a tla lala, re leballane melato ka selemo seo.
32“Re iketsetsa melao, eo ka eona re itlamang hore ka selemo le selemo re tla ntša silefera e etsang boima ba likeramo tse hlano, bakeng sa mosebetsi oa Tempele ea Molimo oa rōna, 33le bakeng sa bohobe bo halalelang, le nyehelo ea lijo ea letsatsi ka leng, le nyehelo ea secheso ea Sabatha se seng le se seng, le nyehelo ea ho thoasa ha khoeli, le nyehelo ea mekete e khethehileng, le nyehelo ea lintho tse halalelang, le nyehelo e tlosang sebe ho etsetsa sechaba sa Iseraele tefelo ea sebe, bakeng sa mesebetsi eohle ea Tempele ea Molimo.
34“Re etsa lōtho har'a baprista, le Balevi, le sechaba, hore re tle re bone hore na ke bo-mang, ho ea ka malapa abo bona, ba tla tlisa patsi ea nyehelo ka Tempeleng ea Molimo ka linako tse beiloeng ka selemo le selemo, e leng patsi e tla besoa holim'a aletare ea Morena Molimo oa rōna, joalokaha ho ngotsoe Molaong.
35“Ka selemo le selemo re tla tlisa ka Tempeleng ea Morena lilopotsiea tse tsoang masimong a rōna, le lilopotsiea tsa litholoana tsa lifate tsohle.
36“Joalokaha ho ngotsoe Molaong, re tla tlisa matsibolo a bara ba rōna, le a liphoofolo tsa rōna, le a mehlape ea likhomo tsa rōna, le a likhutšoane tsa rōna, ka Tempeleng ea Morena, re a nee baprista ba sebeletsang ka Tempeleng ea Morena.
37“Ka matlung a pōlōkelo a Tempele ea Molimo oa rōna, re tla tlisetsa baprista hlama ea lilopotsiea tsa koro, le linyehelo tsa rōna, le litholoana tsa mefuta eohle ea lifate, le tsa veine, le tsa ole. Re tla tlisetsa Balevi karolo e le 'ngoe ho tse leshome tsa tse tsoang masimong a rōna, hobane ke bona Balevi bao ba fumanang karolo e le 'ngoe ho tse leshome tsa tsohle tseo re li lemang. 38Moprista, eo e leng mora oa Arone, o tla ba teng ha Balevi ba amohela karolo e le 'ngoe ho tse leshome. Joale Balevi ba tla tlisa karolo e le 'ngoe ea likarolo tsohle tse leshome, e tsoang likarolong tsohle tsa leshome tse tlisitsoeng ka Tempeleng ea Molimo oa rōna, ba li kenye ka likamoreng tsa letlōle la Tempele. 39Bana ba Iseraele, le bana ba Levi, ba tla tlisa nyehelo ea koro, le ea veine e ncha, le ea ole, ka likamoreng tseo ho bōlōkeloang thepa ea Sehalalelo ka ho tsona, e leng moo baprista ba sebeletsang teng, le balebeli ba menyako, le libini, ba lulang teng.
“Ha e le rōna, re ke ke ra furalla Tempele ea Molimo oa rōna.”
