MAREKA 9

₁Jesu a re ho bona: “Kannete kea le bolella, ho na le ba bang har'a ba emeng mona ba ke keng ba tseba lefu, ho fihlela ba bona 'Muso oa Molimo o e-tla ka matla.”

₂Kamora' matsatsi a tšeletseng, Jesu a nka Petrose, le Jakobo, le Johanne, a ea le bona thabeng e telele ba le bang, boinotšing. A fetoha tšobotsi a le pel'a bona; ₃liaparo tsa hae tsa qala ho benya, tsa e-ba tšoeu bja! ka mokhoa oo ho se nang sehlatsoi se lefatšeng se ka tsebang ho soeufatsa hakaalo. ₄Elia le Moshe ba iponahatsa ho bona ba ntse ba bua le Jesu.

₅Petrose a re ho Jesu: “Moruti, ke hantle ha re le mona; a re hlomeng maphephe a mararo, le leng e be la hao, le leng e be la Moshe, le leng e be la Elia.” ₆A se ke a tseba hore na a ka re'ng, hobane ba ne ba tšohile haholo.

₇Leru la hlaha, la ba khurumetsa, 'me lentsoe le tsoang lerung la re: “Enoa ke Mora oa ka eo ke mo ratang, mo mameleng.”

₈Hang-hang ha ba qamaka, ba se ke ba bona motho ea nang le bona haese Jesu feela.

₉Ha ba ntse ba theoha thabeng, Jesu a ba laea hore ba se ke ba phetela motho tseo ba li boneng, haese ha Mor'a Motho a se a tsohile bafung.

₁₀Ba mamela taelo eo, ba ntse ba ipotsa hore na ho tsoha bafung ke ho re'ng.

₁₁Ba 'motsa, ba re: “Ke hobane'ng ha Litsebi tsa Molao li re, Elia eka khona a tle pele?”

₁₂A re ho bona: “Ehlile Elia o tla tla pele ho busetsa lintho tsohle malulong; athe ho ngotsoe joang ka Mor'a Motho hore o tšoanetse ho hlōkōfatsoa haholo, le ho nyelisoa? ₁₃Empa kea le bolella: Elia o ile a tla, 'me ba ile ba mo etsa kamoo ba ratang kateng, joalokaha ho ngotsoe ka eena.”

₁₄Ha ba fihla ho barutuoa, ba bona letšoelehali le ba teetse hare, le Litsebi tsa Molao li phea khang le bona. ₁₅Hang-hang ha letšoele lohle le bona Jesu, la makala haholo, 'me la mathela ho eena, la mo lumelisa.

₁₆A ba botsa, a re: “Ke eng eo le pheang khang ka eona le bona?”

₁₇E mong oa ba letšoele a mo araba, a re: “Moruti, ke tlisitse mora oa ka ea nang le moea o semumu ho uena. ₁₈Kae le kae moo o mo tšoarang, o mo tabanya fatše, a khethetse makoeba, a tsikitlanye meno, a satalle. Ke ile ka kōpa barutuoa ba hao hore ba o leleke, empa ba ile ba hlōleha.”

₁₉A ba araba, a re: “A molōko o sa lumeleng! Ke tla ba le lōna ho fihlela neng? Ke tla le mamella ho fihlela neneng? Mo tliseng ho 'na!”

₂₀Ba mo tlisa ho eena. Hang-hang ha moea o bona Jesu, oa tsukutla ngoana habohlōkō, 'me a oela fatše a thakhinya, a ntse a khethetsa makoeba.

₂₁Jesu a botsa ntat'a ngoana: “E se e le nako e kae a hlahetsoe ke hoo?”

A re: “Ho tloha bongoaneng ba hae; ₂₂o atisa ho mo lahlela mollong le metsing, hore o tle o mo timetse, empa haeba u ka etsa ho hong, re hauhele, 'me u re thuse.”

₂₃Jesu a re ho eena: “U re, ‘haeba u ka etsa!’ Tsohle li ka etsahala ho ea lumelang!”

₂₄Eaba ntat'a ngoana oa hōoa, o re: “Kea lumela; thusa ho hloka tumelo ha ka!”

₂₅Ha Jesu a bona hore letšoele le mathela ho eena, a khalemela moea o litšila ka matla, a re ho oona: “Moea o semumu, o tsebetutu, kea u laela, tsoa ho eena, 'me u se ke ua hlola u kena ho eena hape!”

₂₆Oa bokolla, oa mo tsukutla habohlōkō, 'me oa tsoa; ngoana a ba joaloka setōpō, hoo ba bangata ba ileng ba re o shoele. ₂₇Empa Jesu a mo tšoara ka letsoho, a mo tsosa, 'me a ema.

₂₈Ha a fihla ka tlung, barutuoa ba hae ba 'motsa boinotšing, ba re: “Ke ka baka la'ng rōna re sitiloeng ho o leleka?”

₂₉A re ho bona: “Mofuta ona ha o tsoe haese ka thapelo.”

₃₀Ba tloha moo, 'me ba haola Galelea. Jesu o ne a sa rate ha ho ka tseba motho, ₃₁hobane o ne a ruta barutuoa ba hae, a ba bolella, a re: “Mor'a Motho o se a tla neeloa matsohong a batho, 'me ba tla 'molaea; ha a se a bolailoe, o tla tsoha bafung kamora' matsatsi a mararo.”

₃₂Ba se ke ba utloisisa polelo eo, empa ba tšaba ho 'motsa.

₃₃Ba fihla Kaperenauma. Jesu ha a le ka tlung, a ba botsa, a re: “Le ne le pheisana khang ea eng tseleng?”

₃₄Ba khutsa, hobane ba ne ba ile ba pheisana khang tseleng ka ho re na e moholo ke ofe. ₃₅Hoba a lule, a bitsa ba leshome le metso e 'meli, a re ho bona: “Haeba mang kapa mang a rata ho ba oa pele, e be oa ho qetela ho bohle le mosebeletsi oa bohle.”

₃₆A nka ngoana, a mo emisa kapele ho bona, 'me hoba a mo sike, a re ho bona: ₃₇“Mang le mang ea amohelang e mong oa bana ba joaloka enoa lebitsong la ka, oa nkamohela, 'me ea nkamohelang, ha a amohele 'na, empa o amohela ea nthōmileng.”

₃₈Johanne a re ho eena: “Moruti, re bone e mong a leleka bademona ka lebitso la hao, 'me ra mo thibela, hobane a sa re latele.”

₃₉Jesu a re: “Le se ke la mo thibela, kahobane ha ho ea ka etsang ketso e hlollang ka lebitso la ka, ebe a ka phakisa a mpua hampe, ₄₀hobane ea sa re loantšeng o eme le rōna. ₄₁Kannete kea le bolella, mang le mang ea le fang mohope oa metsi kahobane le le ba Kreste, ha a ka ke a hloka moputso oa hae.

₄₂“Mang le mang ea lihelang sebeng e mong oa ba banyenyane bana ba lumelang ho 'na, ho molemo ho eena ha a tlamelloa leloala molaleng, 'me a lahleloa leoatleng. ₄₃Haeba letsoho la hao le u lihela sebeng, le pōme; ho molemo ho uena ho kena bophelong u le tsohane, ho e-na le ho ea liheleng, mollong o sa timeng, u e-na le matsoho a mabeli, ₄₄moo sebōkō se ba jang ka ho sa feleng, 'me mollo o sa timeng. ₄₅Haeba leoto la hao le u lihela sebeng, le pōme; ho molemo ho uena ho kena bophelong u le kōtoane, ho e-na le ho lahleloa liheleng u e-na le maoto a mabeli, ₄₆moo sebōkō se ba jang ka ho sa feleng, 'me mollo o sa timeng. ₄₇Haeba leihlo la hao le u lihela sebeng, le honye; ho molemo ho uena ho kena 'Musong oa Molimo u le moihloe, ho e-na le ho lahleloa liheleng u le mahlo a mabeli, ₄₈moo sebōkō se ba jang ka ho sa feleng, 'me mollo o sa timeng, ₄₉hobane e mong le e mong o tla nōkoa ka mollo.

₅₀“Letsoai le molemo, empa letsoai ha le tapile, le ka tsoaifatsoa joang? E-bang le letsoai ka ho lōna, 'me le phelisane ka khotso.”