MAREKA 4

₁Jesu a boela a qala ho ruta a le pel'a letša. Letšoelehali la 'mōkanela hoo a bileng a kena ka sekepeng se letšeng, a lula teng, letšoele lohle le le lebōpong la letša. ₂A ba ruta litaba tse ngata ka litšoantšo, 'me thutong ea hae a re ho bona:

₃“Mamelang! Mojali o ile a tsoa ho ea jala. ₄Eare ha a ntse a jala, peō e 'ngoe ea oela ka tseleng, 'me linonyana tsa tla, tsa e ja. ₅E 'ngoe ea oela mokurutlaneng, moo ho se nang mobu o mongata; ea phakisa ea mela, hobane mobu o ne o sa teba. ₆Eare ha letsatsi le chaba la e chesa, ea omella, hobane metso e ne e sa teba. ₇E 'ngoe ea oela har'a meutloa, 'me meutloa ea hōla, ea e bipetsa, ea se ke ea beha. ₈Empa peō e 'ngoe ea oela mobung o motle, ea mela, ea hōla, ea beha, e 'ngoe tse mashome a mararo, e 'ngoe tse mashome a tšeletseng, e 'ngoe tse lekholo.”

₉Eaba o re: “Ea nang le litsebe ho utloa, a utloe!”

₁₀Eare ha a le inotši, ba neng ba e-na le eena, 'moho le ba leshome le metso e 'meli, ba 'motsa tsa litšoantšo tsena. ₁₁A re ho bona: “Lōna le senoletsoe sephiri sa 'Muso oa Molimo, empa ho ba kathōko, tsohle li tla ka litšoantšo, ₁₂e le hore ba tle

₁₃Eaba o re ho bona: “Na ha le utloisise setšoantšo see? Ekaba litšoantšo tsohle le tla li utloisisa joang? ₁₄Mojali o jala lentsoe. ₁₅Peō e ka tseleng ke bao lentsoe le jaloang ho bona, empa ere hoba ba le utloe, ebe hang-hang Satane oa tla, o tlosa lentsoe le jetsoeng ho bona. ₁₆Peō e jetsoeng mokurutlaneng ke bao ereng ha ba utloa lentsoe, ba phakise ba le amohele ka thabo, ₁₇empa ha ba na metso ka ho bona, ke batho ba mamellang ka nakoana, 'me ha ho hlaha matšoenyeho kapa litlhoriso ka baka la lentsoe, ba phakisa ho koeneha. ₁₈Peō e 'ngoe e jetsoeng meutloeng, ke ba utloang lentsoe, ₁₉empa likhathatso tsa mehla ea joale, le thetso ea maruo, le litakatso tsa lintho tse ling, li ee li tle li bipetse lentsoe, le nyōpe.

₂₀“Peō e jetsoeng mobung o motle ke ba utloang lentsoe, ba le amohele, 'me ba behe, ba bang tse mashome a mararo, ba bang tse mashome a tšeletseng, ba bang tse lekholo.”

₂₁Jesu a re ho bona: “Na lebone le ee le tlisetsoe ho tla koaheloa ka nkho kapa ho beoa tlas'a bethe, e seng ho tla beoa seluloaneng sa lona? ₂₂Ha ho letho le patiloeng le ke keng la hlahela, kapa le sephiri se ke keng sa pepesoa. ₂₃Haeba motho a e-na le litsebe ho utloa, a utloe!”

₂₄A boela a re ho bona: “Hlokomelang seo le se utloang. Tekanyo eo le lekanyang ka eona le tla lekanyetsoa ka eona, 'me le be le ekeletsoe, ₂₅hobane ea nang le letho o tla ekeletsoa, empa ea se nang letho o tla amohuoa le seo a nang le sona.”

₂₆Eaba Jesu o re: “'Muso oa Molimo o joalokaha motho a jala peō tšimong; ₂₇ebe oa robala, a tsohe, bosiu le motšeare, peō e mele, e hōle, eena a sa tsebe na e mela joang. ₂₈Mobu ka booona o melisa lijalo: pele ke lekhaba, e be qoapi, e tl'o ba matšohlo. ₂₉Ha koro e butsoitse, o e hela hang-hang, hobane nako ea kotulo e fihlile.”

₃₀Jesu a re: “'Muso oa Molimo re ka o tšoantša joang? Re ka o hlalosa ka setšoantšo sefe? ₃₁O joaloka tlhaku ea mosetareta, e leng e nyenyane ho feta litlhaku tsohle ha e jaloa mobung. ₃₂Empa ha e se e jaliloe ea mela, e be kholo ho feta litlama tsohle; e etse makala a maholo, hoo linonyana tse fofang li ka tsebang ho hahela moriting oa 'ona.”

₃₃A ba ruta lentsoe ka litsoantšo tse ngata tse kang sena, ho ea kamoo ba neng ba ka utloisisa kateng. ₃₄O ne a sa ke be a bue le bona haese ka setšoantšo, empa lekunutung o ne a hlalosetsa barutuoa ba hae tsohle.

₃₅Mantsiboeeng a letsatsi lona leo, Jesu a re ho bona: “A re tšeleleng ka mose oane.” ₃₆Ba tloha har'a letšoele, ba ea le eena ka sekepe seo a neng a ntse a le ka ho sona, 'me a felehetsoa ke likepe tse ling. ₃₇Sefefo se matla sa tsoha, maqhubu a phuthumetsehela ka sekepeng, hoo se batlileng se tlala. ₃₈Jesu o n'a le karolong e kamorao ea sekepe, a khalehile mosamong. Ba mo tsosa, ba re ho eena: “Moruti! Na ha u tsotelle ha re timela?”

₃₉A tsoha, a khalemela moea, a re ho letša: “Lilimala! Khutsa!” Moea oa teba, 'me ha khutsa tu! ₄₀A re ho bona: “Le boi ke'ng? Na ha le e-s'o be le tumelo?”

₄₁Ba tšoha haholo, 'me ba botsana, ba re: “Ekaba motho eo ke mang, ea mameloang ke moea le ke letša?”