MAREKA 2

₁Hoba Jesu a khutlele Kaperenauma kamora' matsatsinyana, ha utloahala hore o teng hae. ₂Ha bōkana batho ba bangata, hoo ho ileng ha hlokahala sebaka sa ho ema, leha e le monyako feela, 'me a ba ruta lentsoe. ₃Ba mo tlisetsa motho ea shoeleng litho, a nkiloe ke banna ba bane, ₄'me kaha ba ne ba sitoa ho mo tlisa pel'a hae ka baka la letšoele, ba phunya marulelo a ntlo malebana le moo Jesu a neng a le teng. Ha ba se ba a phuntse, ba lepeletsa liphate tseo motho ea shoeleng litho a robetseng ho tsona. ₅Jesu ha a bona tumelo ea bona, a re ho ea shoeleng litho: “Ngoan'a ka, u tšoaretsoe libe tsa hao.”

₆Ho ne ho e-na le Litsebi tsa Molao tse neng li lutse moo, 'me tsa ipotsa, tsa re: ₇“Ke ka baka la'ng motho eo a buang tjee? Oa nyefola! Ke mang ea ka tšoarelang libe haese Molimo feela?”

₈Hang-hang Jesu ha a tseba ka moeeng oa hae hore ba ipotsa joalo, a re ho bona: “Ke ka baka la'ng le ipotsang tjee? ₉Ho bonolo ke hofe, ho re ho ea shoeleng litho: ‘U tšoaretsoe libe tsa hao,’ kapa ho re: ‘Tsoha, u nke liphate tsa hao, u tsamaee?’ ₁₀Joale hore le tle le tsebe hore Mor'a Motho o na le matla a ho tšoarela libe lefatšeng,” a re ho ea shoeleng litho, ₁₁“ke re ho uena: Tsoha, u nke liphate tsa hao, 'me u ee hae.”

₁₂Hang-hang a tsoha, a nka liphate tsa hae, a tsoa, bohle ba mo talimile, hoo ba ileng ba hlolloa haholo, 'me ba tlotlisa Molimo, ba re: “Ha re e-s'o bone ntho e tjena!”

₁₃Jesu a boela a ea lebōpong la letša; letšoele lohle la tla ho eena, 'me a le ruta. ₁₄Eare ha a feta a bona Levi, mora oa Alefiose, a lutse tlung ea lekhetho, 'me a re ho eena: “Ntatele!” A ema, 'me a mo latela.

₁₅Ha a le lijong ha Levi, balekhetho le baetsalibe ba bangata ba ne ba mo latetse. ₁₆Litsebi tsa Molao, tseo e neng e le Bafarisi, ha li bona hore o ja le baetsalibe le balekhetho, tsa re ho barutuoa ba hae: “Ke ka baka la'ng ha a e-ja le balekhetho le baetsalibe?”

₁₇Jesu ha a utloa, a re ho tsona: “Ba hlokang ngaka ke ba kulang, e seng ba phelang hantle. Ke tlile ho bitsa baetsalibe, e seng ba lokileng.”

₁₈Barutuoa ba Johanne le Bafarisi ba ne ba itima lijo. Batho ba tla, 'me ba re ho Jesu: “Ke ka baka la'ng ha barutuoa ba Johanne le ba Bafarisi ba itima lijo, empa barutuoa ba hao ba sa itime?”

₁₉Jesu a re ho bona: “Na baetsana ba ka itima lijo ha monyali a ntse a e-na le bona? Ha monyali a ntse a e-na le bona ba ke ke ba itima lijo. ₂₀Ho tla tla matsatsi ao ka 'ona monyali a tla tlosoa ho bona, 'me mohlang oo ba tla itima lijo.

₂₁“Ha ho motho ea rōkellang setsiba sa lesela le lecha seaparong sa khale; esere setsiba se secha sa nathola seaparo sa khale, 'me sa eketsa ho taboha. ₂₂Ha ho motho ea tšèlang veine e ncha makukeng a khale; esere veine ea phatlola makuka, 'me veine le makuka tsa senyeha. Empa veine e ncha e tšèloa makukeng a macha!”

₂₃Ka letsatsi le leng la Sabatha Jesu a feta har'a masimo a koro, 'me barutuoa ba hae ba qala ho kha matšohlo ha ba ntse ba tsamaea. ₂₄Bafarisi ba re ho eena: “Bona, ke ka baka la'ng ha ba etsa se sa lumelloang ka letsatsi la Sabatha?”

₂₅A re ho bona: “Na ha le e-s'o ka le bala seo Davida a neng a se etse, 'moho le bao a neng a e-na le bona, ha ba lapile, 'me ba hloka se jeoang; ₂₆kamoo a neng a kene ka Tlung ea Molimo kateng, mehleng ea Moprista e Moholo Abiatare, a ja bohobe bo halalelang e leng boo a neng a sa lumelloa ho bo ja, bo jeoa ke baprista feela, a ba a fa le bao a neng a e-na le bona?”

₂₇A re ho bona: “Sabatha se entsoe ka baka la motho, e seng motho ka baka la Sabatha. ₂₈Ka baka leo, Mor'a Motho ke Morena, esita le oa Sabatha.”