MATHEU 7

₁“Se ahlōleng ba bang, hore Molimo a tle a se ke a le ahlōla, ₂hobane le tla ahlōloa ka kahlōlo eo le ahlōlang ba bang ka eona, 'me kahlōlo eo ea lōna e tla lekanyetsoa ka tekanyo eo le lekanyetsang ba bang ka eona.

₃“U talimela'ng phatsa e ka leihlong la ngoan'eno, empa u sa lemohe sekoqo se ka leihlong la hao? ₄Kapa u ka re joang ho ngoan'eno: ‘E-re ke ntše phatsa e ka leihlong la hao,’ athe sekoqo ke seo ka leihlong la hao? ₅Moikaketsi, ntša sekoqo se ka leihlong la hao pele, 'me ke hona u tla bona hantle ho ntša phatsa e ka leihlong la ngoan'eno.

₆“Se neeng lintja lintho tse halalelang, esere mohlomong tsa reteleha, tsa le harola; leha e le ho lahlela mabenyane a lōna a bohlokoa pel'a likolobe, esere mohlomong tsa a hatakela ka maoto.

₇“Kōpang, le tla fuoa; batlang, le tla fumana; kokotang, le tla buleloa, ₈hobane mang kapa mang ea kōpang oa fuoa, ea batlang oa fumana, 'me ea kokotang oa buleloa.

₉“Ekaba ke mang ho lōna, eo ekareng ha mora oa hae a mo kōpa bohobe, eaba o mo fa lejoe? ₁₀Kapa ha a mo kōpa tlhapi, ebe o mo fa nōha? ₁₁Ha ho le joalo, ha lōna ba khopo le tseba ho fana ka tse molemo ho bana ba lōna, Ntat'a lōna ea maholimong o tla fana haholo hakaakang ka tse molemo ho ba mo kōpang? ₁₂Ha ho le joalo, tsohle tseo le ratang hore batho ba le etse tsona, le lōna le ba etse tsona; ke oona Molao le Baporofeta.

₁₃“Kenang ka khoro e patisaneng, hobane khoro e isang timelong e hèbèhèbè, le tsela e eang teng e sephara, 'me ba kenang ka eona ba bangata, ₁₄empa khoro e isang bophelong e patisane, le tsela e eang teng e boima, 'me ba e fumanang ha ba bakae.

₁₅“Hlokomelang baporofeta ba bohata, ba tlang ho lōna ba ikhakantse eka ke linku, empa kahare e le liphiri tse harōlakang. ₁₆Le tla ba tseba ka liketso tsa bona. Na batho ba ke ba khe morara meutloeng, kapa lifeiee hlabahlabaneng? ₁₇Ka mokhoa o joalo, sefate ka seng se monate se beha litholoana tse monate, empa sefate se sebe se beha litholoana tse mpe. ₁₈Sefate se monate se sitoa ho beha litholoana tse mpe, leha e le sefate se sebe ho beha litholoana tse monate. ₁₉Sefate ka seng se sa beheng litholoana tse monate se ee se rengoe, se lahleloe mollong. ₂₀Ka hona le tla ba tseba ka liketso tsa bona.

₂₁“Hase mang kapa mang ea reng ho 'na: ‘Morena, Morena,’ ea tla kena 'Musong oa maholimo, empa ho tla kena ea etsang thato ea Ntate ea maholimong. ₂₂Tsatsing leo ba bangata ba tla re ho 'na: ‘Morena, Morena, na ha rea ka ra porofeta ka lebitso la hao, ra leleka bademona ka lebitso la hao, ra etsa liketso tse ngata, tse hlollang, ka lebitso la hao na?’ ₂₃Mohlang oo ke tla ba bolella pepenene, ke re: ‘Ha kea ka ka le tseba; tlohang ho 'na, lōna ba etsang bokhopo!’

₂₄“Ha ho le joalo, mang le mang ea utloang lipolelo tsena tsa ka, a li phetha, o tla tšoantšoa le motho ea bohlale, ea ileng a haha ntlo ea hae holim'a letlapa. ₂₅Sekhōhōla sa fihla, liphororo tsa matha, meea ea puka, ea khahlela ntlo eo, empa ha ea ka ea oa, hobane e ne e theiloe holim'a letlapa. ₂₆Athe mang le mang ea utloang lipolelo tsena tsa ka, a sa li phethe, o tla tšoantšoa le motho ea sethoto, ea ileng a haha ntlo ea hae lehlabatheng. ₂₇Sekhōhōla sa fihla, liphororo tsa matha, meea ea puka, ea khahlela ntlo eo, eaba ea oa, 'me ho oa ha eona ea e-ba ho tšabehang.”

₂₈Ha Jesu a qetile lipolelo tsena, matšoele a tsota thuto ea hae, ₂₉hobane o ne a ruta joaloka ea nang le matla, e seng joaloka Litsebi tsa Molao tsa bona.