E moholo 'Musong oa maholimo
1Ka nako eo barutuoa ba tla ho Jesu, ba re: “E moholo 'Musong oa maholimo ke mang?”
2Jesu a bitsa ngoana, a mo emisa kapele ho bona, 3a re: “Ruri ke re ho lōna, ha le sa fetohe la tšoana le bana, le ke ke la kena 'Musong oa maholimo. 4Ka baka leo, ea ikokobetsang joaloka ngoana enoa ke eena e moholo 'Musong oa maholimo. 5Mang kapa mang ea amohelang ngoana ea joaloka enoa lebitsong la ka, oa nkamohela.
Meleko
6“Mang kapa mang ea lihelang sebeng e mong oa ba banyenyane bana ba lumelang ho 'na, ho molemo ho eena hore a tlamelloe leloala molaleng, 'me a liheloe bolibeng ba leoatle. 7Ho malimabe lefatše ka baka la likhopiso. Likhopiso li tlameha ho hlaha, empa ho malimabe motho eo likhopiso li hlahang ka eena.
8“Haeba letsoho la hao kapa leoto la hao le u lihela sebeng, le pōme, u le lahle; ho molemo ho uena ho kena bophelong u le tsohane kapa kōtoane ho e-na le ho lahleloa mollong o sa timeng u e-na le matsoho a mabeli kapa maoto a mabeli. 9Ha leihlo la hao le u lihela sebeng, le honye, u le lahle; ho molemo ho uena ho kena bophelong u le moihloe, ho e-na le ho lahleloa mollong oa lihele u le mahlo a mabeli.
Setšoantšo sa nku e lahlehileng
10“Hlokomelang hore le se ke la nyelisa e mong oa ba banyenyane bana, hobane kea le bolella: Mangeloi a bona a leholimong, a bona sefahleho sa Ntate ea maholimong kamehla. 11Mor'a Motho o tlile ho pholosa se neng se lahlehile.
12“Le re'ng na? Ha motho a e-na le linku tse lekholo, 'me e 'ngoe ea tsona e lahleha, na a ke ke a siea tse mashome a robong a metso e robong lithabeng, a ea batla e lahlehileng? 13Haeba a ka e fumana, ruri ke re ho lōna, o tla e thabela ho feta tse mashome a robong a metso e robong tse sa kang tsa lahleha. 14Ka mokhoa o joalo, Ntat'a lōna ea maholimong ha a rate hore ho timele le ea mong oa ba banyenyane bana.
Motho ea etsang sebe
15“Ha ngoan'eno a u sitetsoe, e-ea, u mo nyatse le le inotši. Haeba a u mamela, e tla ba u hapile pelo ea hae. 16Empa ha a sa u mamele, nka motho a le mong kapa ba babeli, e le hore taba efe kapa efe e tiisoe ka bopaki ba batho ba babeli kapa ba bararo, 17empa ha a hana ho ba mamela, bolella kereke; haeba a hana ho mamela le eona kereke, mo talime e le mohedene le molekhetho.
18“Ruri ke re ho lōna: Tsohle tseo le li tlamang lefatšeng li tla tlangoa leholimong, 'me tsohle tseo le li lokollang lefatšeng li tla lokolloa leholimong.
19“Hape ke re ho lōna: Haeba ba babeli ba lōna ba e-ba ntsoeleng nthong e 'ngoe le e 'ngoe eo ba e kōpang lefatšeng, ba tla e etsetsoa ke Ntate ea maholimong, 20hobane moo ba babeli kapa ba bararo ba phuthehetseng teng ka lebitso la ka, ke teng har'a bona.”
Setšoantšo sa ea sa tšoareleng
21Joale Petrose a tla ho eena, a re: “Morena, ngoan'eso ha a ntse a ntšiteloa ke tla mo tšoarela hakae? Hasupa na?”
22Jesu a re ho eena: “Ke re ho uena e seng hasupa, empa hamashome a supileng hasupa.
23“Ka baka leo, 'Muso oa maholimo o ka tšoantšoa le khosi e itseng, e ratileng ho hlahlobisana boemo ba tšebetso le bahlanka ba eona. 24Eitse ha e qala ho etsa joalo, ea tlisetsoa e mong ea nang le molato oa chelete e litalenta tse kete tse leshome. 25Kaha a ne a hloka seo a neng a ka lefa ka sona, mong'a hae a laela hore a rekisoe hammoho le mosali oa hae, le bana ba hae, le tsohle tseo a nang le tsona, 'me ho lefshoe.
26“Empa mohlanka a itihela maotong a hae, a re: ‘Nkhauhele, ke tla u lefa tsohle.’ 27Mong'a mohlanka eo a mo utloela bohlōkō, a mo lokolla, a mo leballa molato.
28“Empa hoba mohlanka eo a tsoe, a kopana le e mong oa balekane ba hae ba bohlanka, ea neng a e-na le molato oa lidenare tse lekholo ho eena. A mo tšoara, a mo khama, a re: ‘Lefa molato oa hao!’
29“Molekane oa hae a itihela maotong a hae, a mo rapela, a re: ‘Nkhauhele, ke tla u lefa.’ 30Empa eena a hana, a ea mo hlahlela chankaneng ho fihlela a ka lefa molato. 31Ha balekane ba hae ba bohlanka ba bona se etsahetseng, ba soaba haholo, 'me ba ea phetela mong'a bona tsohle tse etsahetseng.
32“Eaba mong'a hae oa 'mitsa, o re ho eena: ‘Mohlanka ea khopo, ke u lebaletse molato oohle hobane u ile ua nthapela. 33Na e ne e se tšoanelo hore le uena u hauhele molekane oa hao, joalokaha le 'na ke ile ka u hauhela?’ 34Mong'a hae a halefa, a mo neela bahlōkōfatsi ho fihlela a ka lefa molato kaofela.
35“Le Ntate ea maholimong o tla le etsa joalo, ha le sa tšoarelane bohle ka pelo tsa lōna tsohle.”
