MATHEU 16

₁Bafarisi le Basaduke ba tla ho Jesu, 'me ka ho mo leka ba kōpa hore a ke a ba bontše sesupo se tsoang leholimong.

₂A ba araba, a re: “Ha ho phirimile le ee le re: ‘Letsatsi le tla ba letle, hobane leholimo le lefubelu.’ ₃Hoseng le re: ‘Kajeno ho tla ba le sefefo, hobane leholimo le bofubelu bo lefifi.’ Le tseba ho hlalosa sebōpeho sa leholimo; athe le sitoa ho hlalosa litšupo tsa linako tsee! ₄Molōko o khopo, oa bakoenehi, o batla sesupo, empa o ke ke oa neoa sesupo, haese sa Jonase.” Eaba o tloha ho bona, oa ikela.

₅Ha barutuoa ba tšelela mose oane, ba lemoha hore ba lebetse ho inkela bohobe. ₆Jesu a re ho bona: “E-bang seli, le hlokomele tomōso ea Bafarisi le Basaduke.”

₇Ba buisana ba le bang, ba re: “Ke hobane ha rea tla le bohobe!”

₈Empa Jesu ka ho tseba mehopolo ea bona, a re: “Lōna ba tumelo e fokolang! Ke'ng ha le buisana, le re: ‘Ke hobane ha rea tla le bohobe?’ ₉Na le joale ha le e-s'o utloisise? Na ha le sa hopola linkhoa tse hlano tseo le neng le li abele ba likete tse hlano, le hore na le ne le bōkelle lirōtō tse kae tse tletseng makumane? ₁₀Leha e le linkhoa tse supileng tseo le neng le li abele ba likete tse 'ne, le hore na le ne le bōkelle lirōtō tse kae tse kholo tse tletseng makumane? ₁₁Le sitoa ke'ng ho utloisisa hore ke ne ke sa bue le lōna ka bohobe? Empa hlokomelang tomōso ea Bafarisi le Basaduke.” ₁₂Joale ba utloisisa hore o ne a sa re ba hlokomele tomōso ea bohobe bo jeoang, empa ba hlokomele thuto ea Bafarisi le Basaduke.

₁₃Eare ha Jesu a fihla sebakeng sa Sesaria-Filipi, a botsa barutuoa ba hae, a re: “Batho ba re Mor'a Motho ke mang?”

₁₄Ba re: “Ba bang ba re, ‘Ke Johanne Mokolobetsi,’ ba bang ba re, ‘Ke Elia,’ 'me ba bang ba re, ‘Ke Jeremia kapa e mong oa baporofeta.’ ”

₁₅A re ho bona: “Empa lōna le re 'na ke mang?”

₁₆Simone Petrose a araba, a re: “U Kreste, Mora oa Molimo ea phelang.”

₁₇Jesu a mo araba, a re: “U lehlohonolo, Simone mor'a Jona, kahobane hase motho oa nama le mali ea u senoletseng hona, empa ke Ntate ea maholimong. ₁₈Joale le 'na kea u bolella, ke re: ‘U Petrose,’ 'me holim'a lefika lena ke tla haha kereke ea ka, 'me monyako oa Qalo ea Bafu o ke ke oa e hlōla. ₁₉Ke tla u nea linotlolo tsa 'Muso oa leholimo; seo u se tlamang lefatšeng se tla tlangoa leholimong, 'me seo u se lokollang lefatšeng se tla lokolloa leholimong.” ₂₀Eaba o laea barutuoa ba hae hore ba se ke ba bolella motho hore ke eena Kreste.

₂₁Ho tloha ka nako eo Jesu a qala ho qaqisetsa barutuoa ba hae hore eka khona a ee Jerusalema, a e'o hlōkōfatsoa haholo ke baholo, le baprista ba baholo, le Litsebi tsa Molao, a bolaoe, 'me ka tsatsi la boraro a tsōsoe bafung.

₂₂Petrose a mo nkela kathōko, a mo khalemela, a re: “Morena Molimo a hauhe! Hona ha ho ka ke ha etsahala ho uena.”

₂₃Empa Jesu a retelehela ho Petrose, a re: “Tloha ho 'na, Satane! U sekhōpi ho 'na, kahobane ha u hopole tsa Molimo, u hopola tsa botho!”

₂₄Eaba Jesu o re ho barutuoa ba hae: “Haeba mang kapa mang a rata ho ntatela, a itele, a inkele sefapano, a ntatele. ₂₅Mang le mang ea ratang ho baballa bophelo ba hae bo tla mo senyehela, empa mang le mang ea senyeheloang ke bophelo ba hae ka baka la ka o tla bo rua. ₂₆Ebe motho a ka boelloa ke eng haeba a ka rua lefatše lohle, empa a senyeheloa ke bophelo ba hae? Kapa motho a ka rekanya bophelo ba hae ka eng? ₂₇Mor'a Motho o tla tla ka tlōtla ea Ntat'ae le mangeloi a hae, 'me o tla putsa motho ka mong ka ho ea ka seo a se entseng. ₂₈Ruri kea le bolella: Ho na le ba bang har'a ba emeng mona ba ke keng ba tseba lefu ho fihlela ba bona Mor'a Motho a e-tla ka 'Muso oa hae.”