MATHEU 15

₁Eaba Bafarisi ba bang le Litsebi tse ling tsa Molao ba tla ho Jesu ba e-tsoa Jerusalema, ba re: ₂“Ke ka baka la'ng ha barutuoa ba hao ba sa hlomphe moetlo oa baholo-holo? Ha ba hatlele ha ba e-ja.”

₃A ba araba, a re: “Ho ea ka'ng ha lōna, ka baka la ho boulela moetlo oa lōna, le tlōla taelo ea Molimo? ₄Molimo o itse: ‘Hlompha ntat'ao le 'm'ao,’ 'me hape a re: ‘Ea rōhakang ntat'ae kapa 'mae a bolaoe.’ ₅Empa lōna le re, ha motho a e-na le seo a ka thusang ntat'ae kapa 'm'ae ka sona, feela a re: ‘Hona ke mpho ho Molimo,’ ₆ha ho sa hlokahala hore a hlomphe ntat'ae. Ka baka la moetlo oa lōna he, le fetotse taelo ea Molimo lefeela. ₇Baikaketsi ting! Esaea o porofetile hantle ka lōna, ha a re:

₁₀Jesu a bitsa letšoele, a re ho lona: “Mamelang, le utloisise! ₁₁Se kenang ka molomo ha se silafatse motho, empa se tsoang ka molomo ke sona se mo silafatsang.”

₁₂Eaba barutuoa ba tla ho eena, ba re: “Na ua tseba hore Bafarisi ba khopisitsoe ke seo u ileng ua se bua?”

₁₃A ba araba, a re: “Semela se seng le se seng se sa lengoang ke Ntate ea maholimong se tla motsuloa. ₁₄Ba tloheleng, ke lifofu tse tataisang lifofu tse ling. Haeba sefofu se tataisa sefofu se seng, bobeli li tla oela ka lengopeng.”

₁₅Petrose a re ho eena: “Ak'u re qaqisetse se boleloang ke setšoantšo sena.”

₁₆Jesu a re: “Na le lōna le ntse le hloka kutloisiso? ₁₇Na ha le utloisise hore se kenang ka molomo se fetisetsoa maleng, se nt'o lahloa mohlabeng? ₁₈Empa tse tsoang ka molomo li tsoa pelong, 'me ke tsona tse silafatsang motho, ₁₉hobane pelong ho tsoa mehopolo e khopo: polao ea sehlōhō, bofebe, bohlola, bosholu, bopaki ba leshano le liketseletso. ₂₀Tsena ke tsona tse silafatsang motho, empa ho ja, motho a sa hlapa matsoho, ha ho mo silafatse.”

₂₁Jesu a tloha moo a ea libakeng tsa Tire le Sidone. ₂₂Eaba mosali oa Mokanana, ea tsoang teng, o tla a hōoa, a re: “Morena, Mor'a Davida, nkutloele bohlōkō! Morali oa ka o tšoenngoa hampe ke modemona.”

₂₃Empa Jesu a se ke a mo araba. Barutuoa ba hae ba tla, ba mo kōpa, ba re: “Mo leleke! Bona kamoo a hōoang a re setse morao kateng!” ₂₄Jesu a araba, a re: “Ha ho moo ke rōmiloeng, haese linkung tsa ntlo ea Iseraele tse lahlehileng.”

₂₅Empa mosali a tla, a itihela maotong a hae, a re: “Nthuse, Morena!”

₂₆Eaba Jesu o re: “Hase hantle ho nka bohobe ba bana, bo akhelloe lintja.”

₂₇Mosali a re: “Ke 'nete, Morena, empa le tsona lintja li ja makumane a oang tafoleng ea mong'a tsona.”

₂₈Jesu ha a utloa hona, a re: “Mosali, tumelo ea hao e kaakang! A ho etsoe kamoo u lakatsang kateng!” 'Me ho tloha nakong eona eo morali oa hae a fola.

₂₉Hoba Jesu a tlohe sebakeng seo, a nka tsela e tsamaeang pel'a letša la Galelea, a nyolohela thabeng, a lula teng. ₃₀Matšoele-tšoele a tla ho eena, a tlisa lihlotsa, lifofu, liritsa, limumu, le ba bang ba bangata, a ba bea pel'a maoto a hae, 'me Jesu a ba folisa. ₃₁Batho ba hlolloa haholo ha ba bona limumu li bua, lihlotsa li folile, liritsa li tsamaea, lifofu li bona, 'me ba tlotlisa Molimo oa Iseraele.

₃₂Jesu a bitsa barutuoa ba hae, a re ho bona: “Ke utloela batho bana bohlōkō, kahobane ba bile le 'na matsatsi a mararo, 'me ha ba na letho leo ba ka le jang. Ha ke lakatse ho ba qhala ba e-s'o je, esere mohlomong ba felloa ke matla tseleng.”

₃₃Barutuoa ba re ho eena: “Ekaba har'a lefeella lee re ka fumana hokae bohobe bo lekaneng ho khōrisa letšoele le lekaale?”

₃₄Jesu a ba botsa, a re: “Le na le linkhoa tse kae?” Ba re: “Ke linkhoa tse supileng le litlhatsoana tse seng kaenyana.”

₃₅Hoba a laele batho hore ba lule fatše, ₃₆a nka linkhoa tse supileng le litlhatsoana; a leboha Molimo, eaba oa ngoatha, o nea barutuoa ba hae, 'me bona ba abela matšoele. ₃₇Bohle ba e-ja, ba khōra, 'me ha ba bōkella makumane a setseng ba tlatsa lirōtō tse supileng tse kholo. ₃₈Ba jeleng e ne e le banna ba likete tse 'ne, ho sa baloe basali le bana. ₃₉Eaba o qhala matšoele, o kena ka sekepeng, o ea naheng ea Magadane.