Setšoantšo sa mojali
1Hona tsatsing leo Jesu a tsoa ka tlung, a ea lula pel'a letša. 2Matšoele-tšoele a mo khōbōkanela, hoo a bileng a kena ka sekepeng; a lula teng, letšoele lohle le le lebōpong. 3A le bolella litaba tse ngata ka litšoantšo, a re:
“Mojali o ile a tsoa ho ea jala. 4Ha a nts'a jala, peō e 'ngoe ea oela ka tseleng, 'me linonyana tsa tla, tsa e ja. 5E 'ngoe ea oela mokurutlaneng, moo ho se nang mobu o mongata. Ea phakisa ea mela, hobane mobu o ne o sa teba, 6empa hoba letsatsi le chabe, la e chesa, ea omella, hobane metso e ne e sa teba. 7E 'ngoe ea oela har'a meutloa, 'me meutloa ea hōla, ea e bipetsa. 8Empa peō e 'ngoe ea oela mobung o motle, 'me ea beha: E 'ngoe tse lekholo, e 'ngoe tse mashome a tšeletseng, e 'ngoe tse mashome a mararo.
9“Ea nang le litsebe a utloe.”
Sepheo sa litšoantšo
10Barutuoa ba tla ho eena, ba re: “Ke ka baka la'ng u buang le bona ka litšoantšo?”
11A ba araba, a re: “Lōna le neiloe ho tseba liphiri tsa 'Muso oa maholimo, athe bona ha baa ho neoa. 12Ea nang le letho o tla ekeletsoa, a be a hafe ka nkatana, empa ea se nang letho o tla amohuoa le seo a nang le sona. 13Ke ka baka lena ke buang le bona ka litšoantšo, hobane leha ba bona, ha ba bone, 'me leha ba utloa, ha ba utloe, leha e le ho utloisisa. 14Ke moo ho phethahalang ho bona boporofeta ba Esaea bo reng:
“ ‘Ho utloa le tla utloa,
empa le ke ke la utloisisa;
ho sheba le tla sheba,
empa le ke ke la bona.
15Lipelo tsa sechaba sena
li thotofetse,
'me litsebe tsa sona li thibane,
se itutabalitse mahlo,
esere mohlomong
sa bona ka mahlo a sona,
sa utloa ka litsebe tsa sona,
sa sokoloha, eaba kea se folisa.’
16“Empa lōna le lehlohonolo kahobane mahlo a lōna aa bona, le litsebe tsa lōna lia utloa. 17Etsoe ruri kea le bolella, baporofeta le ba lokileng ba bangata ba ne ba lakatsa ho bona seo le se bonang, empa ha baa ka ba se bona, le ho utloa seo le se utloang, empa ha baa ka ba se utloa.
Jesu o qaqisa setšoantšo sa mojali
18“Ha ho le joalo, lōna, utloang setšoantšo sa mojali. 19Mang le mang ha a utloa lentsoe la 'Muso oa Molimo, 'me a sa le utloisise, E Mobe o ee a tle, a mo amohe se jetsoeng pelong ea hae; enoa ke eona peō e jetsoeng ka tseleng. 20Peō e jetsoeng mokurutlaneng ke ea utloang lentsoe, a phakise a le amohele ka thabo, 21empa ha a na metso ka ho eena, ke motho ea mamellang ka nakoana, 'me ha ho hlaha matšoenyeho kapa litlhoriso ka baka la Lentsoe la Molimo, o phakisa ho koeneha. 22Peō e jetsoeng meutloeng ke ea utloang lentsoe, feela likhathatso tsa mehla ea joale le thetso ea maruo li bipetsa lentsoe, le nyōpe. 23Peō e jetsoeng mobung o motle ke ea utloang lentsoe, 'me a le utloisise. Enoa ke eena ea behang tse lekholo, kapa tse mashome a tšeletseng, kapa tse mashome a mararo.”
Setšoantšo sa mofoka
24Jesu a ba bolella setšoantšo se seng, a re: “'Muso oa maholimo o tšoantšo le motho ea jetseng peō e ntle tšimong ea hae. 25Eare ha ho robetsoe, sera sa hae sa tla, sa jala mofoka har'a koro, 'me sa ikela. 26Ha lekhaba le se le metse, le bile le tsoetse, mofoka le oona oa bonahala.
27“Basebeletsi ba mong'a tšimo ba tla ho eena, ba re: ‘Monghali, na u ne u sa jala peō e ntle tšimong ea hao? Joale mofoka o tsoa kae?’
28“A re ho bona: ‘Hono ho entsoe ke sera.’
“Basebeletsi ba re ho eena: ‘Joale na u rata hore re e'o o fōthōla?’
29“A re: ‘Che, esere ha le fōthōla mofoka la fōthōlella le koro. 30Li leseng li hōle hammoho ho fihlela mohl'a kotulo, 'me ka nako ea kotulo ke tla re ho bakotuli: Fōthōlang mofoka pele, le o tlame mangata, o tle o chesoe, koro eona le e bōkelle lisiung tsa ka.’ ”
Setšoantšo sa tlhaku ea mosetareta
31Jesu a ba bolella setšoantšo se seng hape, a re: “'Muso oa maholimo o tšoana le tlhaku ea mosetareta, eo motho a ileng a e nka, a e jala tšimong ea hae. 32Ke eona e nyenyane ho feta lipeō tsohle, empa ha e se e hōtse, e feta litlama tse ling tsohle ka boholo, e be sefate seo linonyana tse fofang li ahelang makaleng a sona.”
Setšoantšo sa tomōso
33A ba bolella setšoantšo se seng hape, a re: “'Muso oa maholimo o tšoana le tomōso, eo mosali a ileng a e nka, a e lubella phōfōng ea koro e tekanyo li tharo, ho fihlela hlama kaofela e ba e lomōseha.”
Sepheo sa litšoantšo
34Tseo tsohle Jesu a li bolella matšoele ka litšoantšo, 'me o ne a sa a bolelle letho haese ka litšoantšo; 35e le hore ho tle ho phethahale ho boletsoeng ke moporofeta, ha a re:
“Ke tla bua le bona ka litšoantšo,
ke bolele tse neng li patehile
haesale fatše le thèoa.”
Jesu o qaqisa setšoantšo sa mofoka
36Eaba Jesu o tloha har'a matšoele, o kena ka tlung. Barutuoa ba hae ba tla ho eena, ba re: “Ak'u re qaqisetse setšoantšo sa mofoka o tšimong.”
37A ba araba, a re: “Ea jalang peō e ntle ke Mor'a Motho. 38Tšimo ke lefatše; peō e ntle ke bao e leng bana ba 'Muso oa Molimo, mofoka ke bana ba E Mobe. 39Sera se o jetseng ke Diabolosi. Kotulo ke bofelo ba mehla ea joale; bakotuli ke mangeloi.
40“Joalokaha mofoka o ee o fōthōloe, o chesoe mollong, ho tla ba joalo bofelong ba mehla ea joale. 41Mor'a Motho o tla rōmela mangeloi a hae, 'me a tla tlosa 'Musong oa hae tsohle tse khopisang le ba etsang bokhopo; 42a tla ba lahlela sebōping sa mollo, moo ho tla ba teng lillo le litsikitlano tsa meno. 43Mohlang oo ba lokileng ba tla khanya joaloka letsatsi 'Musong oa Ntat'a bona. Ea nang le litsebe a utloe.
Setšoantšo sa letlotlo le patiloeng
44“'Muso oa maholimo o tšoana le letlotlo le patiloeng tšimong, leo eitseng ha motho a le fumana, a le pata, 'me thabong ea hae a ea rekisa tsohle tseo a nang le tsona, a reka tšimo eo.
Setšoantšo sa mabenyane a bohlokoa
45“Hape, 'Muso oa maholimo o tšoana le mohoebi ea batlang mabenyane a bohlokoa, 46eo ereng hoba a fumane le leng la bohlokoahali, a e'o rekisa tsohle tseo a nang le tsona, a le reke.
Setšoantšo sa letlōoa
47“Hape-hape, 'Muso oa maholimo o tšoana le letlōoa le akhetsoeng leoatleng, le haharang litlhapi tsa mefuta-futa, 48leo ereng ha le se le tletse, batšoasi ba le hulele lebōpong, ba lule fatše, ba hloaele tse ntle ka lipitseng, tse mpe tsona ba li lahle. 49Ho tla ba joalo bofelong ba mehla ea joale; mangeloi a tla tla a khethe ba khopo ho ba lokileng, 50a ba lahlele sebōping sa mollo, moo ho tla ba teng lillo le litsikitlano tsa meno.”
Matlotlo a macha le a khale
51Jesu a ba botsa, a re: “Na le utloisisa tsee tsohle?”
Ba re ho eena: “E.”
52A re ho bona: “Ka baka leo, Setsebi se seng le se seng sa Molao se rutiloeng tsa 'Muso oa maholimo se tšoana le mong'a ntlo ea ntšang tse ncha le tsa khale letlotlong la hae.”
Jesu o hanoa Nasaretha
53Eare hoba Jesu a qete ho bolela litšoantšo tsena, a tloha moo, 54a fihla motseng oa habo, 'me a rutela batho tlung ea bona ea thapelo, hoo ba ileng ba hlolloa, 'me ba re: “Bohlale boo le liketso tsee tse hlollang, eo o li nka kae? 55Na hase mora oa 'metli oa mapolanka? Na 'm'ae hase ea bitsoang Maria, le baena ba hae hase bo-Jakobo, le Josefa, le Simone, le Juda? 56Na likhaitseli tsa hae tsohle ha li har'a rōna moo? Ha ho le joalo, tsena tsohle eena o li nka kae?”
57Ba khopiseha ke eena.
Jesu a re ho bona: “Moporofeta o hlomphuoa hohle haese motseng oa habo le tlung eabo feela.” 58Moo teng ha a ka a etsa liketso tse matla, tse hlollang, ka baka la ho se lumele ha bona.
