Jesu o isoa ho Pilato
1Eaba lekhotla lohle lea ema, 'me le mo isa ho Pilato. 2La qala ho mo qosa, la re: “Re fumane monna enoa a khelosa sechaba sa rōna, a thibela ha ho ntšetsoa Sesare lekhetho, 'me a ipolela hore ke Kreste, Khosi.”
3Pilato a 'motsa, a re: “Na u khosi ea Bajuda?”
A mo araba, a re: “Uena u rialo.”
4Pilato a re ho baprista ba baholo le ho matšoele: “Ha ke fumane molato ho motho enoa.”
5Empa bona ba pheella, ba re: “O hlohleletsa sechaba ka ho ruta Judea eohle, ho tloha Galelea ho fihlela koano.”
Jesu kapel'a Heroda
6Eare Pilato ha a utloa, a botsa hore na motho eo ke Mogalelea na. 7Ha a se a tsebile hore o pusong ea Heroda, a mo rōmela ho Heroda, kaha le eena a ne a le Jerusalema matsatsing ao.
8Joale Heroda a thaba haholo ha a bona Jesu, hobane e ne e le khale a lakatsa ho 'mona. O ne a utloile tsa hae, 'me a tšepile ho bona mohlolo o etsoang ke eena. 9Eaba Heroda o 'motsa potso tse ngata, empa Jesu a se ke a mo araba. 10Baprista ba baholo le Litsebi tsa Molao ba ne ba eme ba mo qosa ka matla. 11Eare hoba Heroda le bahlabani ba hae ba mo nyelise, ba mo some, ba mo apesa seaparo se mahalihali, 'me Heroda a mo khutlisetsa ho Pilato. 12Ka lona letsatsi leo Heroda le Pilato ea e-ba metsoalle, athe pele e ne e le lira.
Jesu o ahlōleloa lefu
13Joale Pilato a bitsa baprista ba baholo, le babusi, le batho, 14a re ho bona: “Le tlisitse monna enoa ho 'na e le ea khelosang batho, empa bonang, 'na, ha ke 'motsisisa moo le leng teng, ha kea fumana molato ho eena ka tseo le mo qosang ka tsona. 15Le Heroda ha a ea o fumana, hobane o mo khutliselitse ho rōna. Ha ho letho leo a le entseng le ka lokelang lefu. 16Ka baka leo, ke tla mo shapa, ke nt'o mo lokolla.” 17Joale o ne a tlameha ho ba lokollela motho a le mong ka mokete o mong le o mong oa Paseka.
18Empa bohle ba hōoa hammoho, ba re: “Bolaea enoa, u re lokollele Barabase!” 19Barabase eo o ne a hlahletsoe chankaneng ka baka la moferefere o ileng oa e-ba teng har'a motse le ka baka la polao.
20Pilato a bua le bona hape, a rata ho lokolla Jesu. 21Empa ba hōoa, ba re: “Mo thakhise, mo thakhise!”
22A re ho bona khetlo la boraro: “Hobane'ng? O entse bobe bofe? Ha kea fumana letho ho eena le ka lokelang lefu; ka baka leo, ke tla mo shapa, ke nt'o mo lokolla.”
23Empa ba pheella ho hōoa ka mantsoe a phahameng, ba kōpa hore a thakhisoe; eaba mehoo ea bona ea mo hlōla. 24Pilato a ahlōla ka hore kōpo ea bona e phethoe. 25A lokolla eo ba neng ba mo kōpa, ea neng a hlahletsoe chankaneng ka baka la moferefere le polao, a ba neela Jesu ho etsa borata ka eena.
Jesu oa thakhisoa
26Ha ba ntse ba qhōba Jesu, ba tšoara motho e mong oa Sirene, ea bitsoang Simone, ea neng a e-tsoa naheng, ba mo jarisa sefapano, a latela Jesu. 27Jesu a lateloa ke letšoelehali la batho, le basali ba neng ba mo hlomohetse, ba mo llela. 28Jesu a retelehela ho bona, a re: “Barali ba Jerusalema, se nteleleng; iteleleng, le llele le bana ba lōna, 29hobane bonang, matsatsi a ea tla, ao ka 'ona ho tla thoe: ‘Ho lehlohonolo linyōpa, le pōpelo tse sa kang tsa tsoala, le matsoele a sa kang a anyesa.’ 30Ke moo ba tla qala ho re ho lithaba:
“ ‘Re oeleng holimo!’
“le ho maralla:
“ ‘Re koaheleng!’
31“Ha e le moo ba etsa tsena sefateng se metsi, ho tla etsahala'ng ho se omeletseng?”
32Ba bang ba babeli, bao e neng e le lisenyi, ba isoa ho ea bolaoa le eena. 33Ha ba fihlile sebakeng se bitsoang Lehata, ba mo thakhisa teng le lisenyi tseo, se seng ka ho le letona, se seng ka ho le letšehali. 34Jesu a re: “Ntate, ba tšoarele, hobane ha ba tsebe seo ba se etsang.” Joale ba arolelana liaparo tsa hae ka lōtho.
35Batho ba ne ba eme ba talimile. Le babusi ba ne ba mo phoqa, ba re: “O pholositse ba bang; haeba e le Kreste, mokhethoa oa Molimo, a ipholose!”
36Le bahlabani ba mo soma; ba atamela, ba mo fa asene, 37'me ba re: “Ha u le khosi ea Bajuda, ipholose he!”
38Kaholimo ho eena ho ne ho e-na le lengolo le reng: enoa ke khosi ea bajuda.
39Se seng sa lisenyi tse fanyehiloeng se ne se mo nyefola, se re: “Na ha u Kreste na? Ipholose, le rōna u re pholose!”
40Empa se seng sa araba, sa se khalemela, sa re: “Na uena ha u tšabe Molimo, empa le le kahlōlong e tšoanang? 41Rōna re hlile re ahlōtsoe ka toka, hobane re amohela moputso oa liketso tsa rōna; athe eena ha aa ka a etsa letho le sa lokang.”
42Sa ba sa re: “Jesu, ak'u nkhopole ha u e-tla ka matla a hao a borena.”
43A re ho sona: “Ruri kea u bolella, kajeno u tla ba le 'na paradeising.”
Lefu la Jesu
44E ne e ka ba hora ea leshome le metso e 'meli motšeare, ha lefifi le aparela naha eohle ho fihlela ka hora ea boraro motšeare oa mantsiboea, 45letsatsi le ntse le fifetse; eaba lesira la Tempele le taboha ka lehare. 46Jesu a meketsa ka lentsoe le phahameng, a re: “Ntate, ke bea moea oa ka matsohong a hao.” Hoba a rialo, a neela moea.
47Eare ha molaoli oa lebōtho la ba lekholo a bona se etsahetseng, a tlotlisa Molimo, a re: “Kannete motho enoa o ne a lokile.” 48Matšoele 'ohle a neng a phuthehetse ho tla bona, hoba a bone se etsahetseng, a khutla a soabile haholo. 49Empa metsoalle eohle ea Jesu, le basali ba neng ba mo latetse ho tloha Galelea, ba ne ba eme sebakana, 'me ba bona ketsahalo tsena.
Kepelo ea Jesu
50Ho ne ho e-na le monna ea bitsoang Josefa, monna ea molemo, ea lokileng, 'me e le setho sa lekhotla. 51E ne e le oa Arimathea motse oa Bajuda, 'me o ne a lebeletse 'Muso oa Molimo. Feela eena o ne a sa lumellana le lekhotla le liketso tsa lona. 52Monna eo a ea ho Pilato, a kōpa setōpō sa Jesu. 53A se fanyolla, a nt'o se phuthela ka lesela, a se bea ka lebitleng le betliloeng lefikeng, leo ho neng ho e-s'o ka ho epeloa motho ho lona. 54E ne e le letsatsi la tlhekelo, 'me e ne e se e tla ba Sabatha.
55Basali ba neng ba tlile le Jesu ba e-tsoa Galelea, ba latela Josefa, ba bona lebitla le kamoo setōpō sa hae se beiloeng kateng. 56Ba khutla, ba lōkisa linōko tse monko o monate le setlolo, 'me ba phomola ka Sabatha ho ea ka Molao.
