Bakang, esere la timela
1Ka eona nako eo ha fihla ba bang, ba tsebisa Jesu tsa Bagalelea bao Pilato a ileng a tsoakanya mali a bona le mahlabelo a bona. 2A ba araba, a re: “Na le nahana hore Bagalelea bana e ne e le baetsalibe ba fetang Bagalelea ba bang bohle, hobane ba hlōkōfalitsoe joalo? 3Che, empa kea le bolella, haeba le sa bake, le tla timela joalo bohle. 4Kapa bale ba leshome le metso e robeli, bao tora e ba oetseng holimo Silōoame, ea ba bolaea, ebe le nahana hore ba ne ba le molato ho feta baahi bohle ba Jerusalema? 5Che, empa kea le bolella, haeba le sa bake, le tla timela joalo bohle.”
Setšoantšo sa sefate sa feiee se sa beheng
6Joale a bolela setšoantšo sena: “Motho e mong o ne a e-na le sefate sa feiee se lemiloeng tšimong ea hae ea morara; eaba o ea batla litholoana ho sona, 'me a se ke a li fumana. 7A re ho molemi oa morara: ‘Bona, e se e le lilemo tse tharo ke ntse ke e-tla ke batla litholoana sefateng sena sa feiee, ke sa li fumane. Se reme! Se otisetsa'ng mobu?’
8“A mo araba, a re: ‘Monghali, ak'u se lese le ka selemo sena, seo ka sona ke tla se lemela, ke se tšèlle moiteli; 9mohlomong se tla beha litholoana nakong e tlang, empa ha ho se joalo, u tla se rema.’ ”
Mosali ea holofetseng o folisoa ka Sabatha
10Jesu o ne a ruta ka ho e 'ngoe ea matlo a thapelo ka Sabatha. 11Ho ne ho e-na le mosali ea bileng le moea o mo holofalitseng ka lilemo tse leshome le metso e robeli; o ne a finahane, a sitoa ho inamoloha ho hang. 12Eare ha Jesu a 'mona, a 'mitsa, a re ho eena: “Mosali, u folisitsoe kholofalong ea hao,” 13a ba a 'mea matsoho; eaba mosali eo o otloloha hang-hang, 'me a tlotlisa Molimo.
14Mookameli oa ntlo ea thapelo a bua a halefile, hobane Jesu a ile a folisa ka Sabatha, a re ho letšoele: “Matsatsi a tšeletse ao eka khonang ho sebetsoe ka 'ona. Ka baka leo, le n'o tla folisoa ka 'ona, e seng ka letsatsi la Sabatha.”
15Empa Morena a mo araba, a re: “Baikaketsi ting, na e mong le e mong oa lōna ha a ke a lokolla pholo ea hae kapa tonki sejelong ka Sabatha, a e ise ho ea noa na? 16Mosali enoa, e leng morali oa Aborahama, eo Satane a mo tlamileng ka lilemo tse leshome le metso e robeli, na o ne a sa lokele ho lokolloa litlamong tseo ka letsatsi la Sabatha na?”
17Ha a rialo, bahanyetsi ba hae bohle ba hlajoa ke lihlong, 'me letšoele lohle la thabela tsohle tse tlōtlehang, tseo a li etsang.
Setšoantšo sa tlhaku ea mosetareta le sa tomōso
18Eaba Jesu o re: “'Muso oa Molimo o tšoana le eng? Nka o tšoantša ka'ng? 19O tšoana le tlhaku ea mosetareta, eo motho a ileng a e nka a e jala serapeng sa hae, ea hōla, ea e-ba sefate, 'me linonyana tse fofang tsa hahela makaleng a sona.”
20Hape a re: “Nka tšoantša 'Muso oa Molimo ka'ng? 21O tšoana le tomōso eo mosali a ileng a e nka, a e lubella phofong ea koro e tekanyo tse tharo, ho fihlela hlama kaofela e ba e lomoseha.”
Monyako o patisaneng
22Jesu a ea le metse le metsana, a ruta, a le leetong la ho ea Jerusalema. 23Joale e mong a re ho eena: “Morena, na ba pholosoang ba tla ba 'maloana na?”
A re ho bona: 24“Etsang ka matla ho kena ka monyako o patisaneng, hobane kea le bolella hore ba bangata ba tla lakatsa ho kena, empa ba tla sitoa. 25Ha mong'a ntlo a se a ile a ema, a koala monyako, 'me le qala ho ema kantle le ho kokota monyako, le re: ‘Monghali, ak'u re bulele;’ o tla le araba, a re: ‘Ha ke tsebe hore na le ba hokae.’
26“Le tla qala ho re: ‘Re kile ra ja, ra noa le uena, ua ruta litseleng tsa rōna,’ 27O tla le bolella, a re: ‘Ha ke tsebe hore na le ba hokae. Tlohang ho 'na, lōna bohle ba etsang bokhopo!’
28“Teng ho tla ba le seboko le litsikitlano tsa meno, ha le bona Aborahama, le Isaka, le Jakobo, le baporofeta bohle 'Musong oa Molimo, empa lōna le lahleloa kantle. 29Batho ba tla tsoa bochabela le bophirimela le leboea le boroa, ba be lijong 'Musong oa Molimo. 30Ke moo ba bang ba ho qetela e tla ba ba pele, le ba bang ba pele e tla ba ba ho qetela.”
Jesu o llela Jerusalema
31Ka eona nako eo Bafarisi ba bang ba atamela, ba re ho Jesu: “Tloha mona, u ikele, hobane Heroda o rata ho u bolaea.”
32A re ho bona: “E-eang, le bolelle phokojoe eo, le re: ‘Bona, kajeno ke leleka bademona, 'me kea folisa, le hosasane ke tla etsa joalo, empa ka letsatsi la boraro ke tla be ke qetile.’ 33Leha ho le joalo, eka khona ke tsamaee kajeno, le hosasane le kamoso, hobane ho ke ke ha etsahala hore moporofeta a bolaeloe kantle ho Jerusalema.
34“Jerusalema, Jerusalema, uena ea bolaeang baporofeta, ea tlepetsang ka majoe ba rōmiloeng ho uena, ke hakae ke lakalitseng ho phutha bana ba hao joalokaha khōhō e alama litsuonyana tsa eona tlas'a mapheo a eona, empa ua ikhanela! 35Bonang, ntlo ea lōna e sala e le lithako. Ha le ka ke la mpona ho fihlela le re: ‘Ho bokoe ea tlang ka lebitso la Morena!’ ”
