Arone o etsa mahlabelo
1Ka letsatsi la borobeli Moshe a bitsa Arone le bara ba hae, le baholo ba Iseraele, 2a re ho Arone: “Nka pohoana ea nyehelo e tlosang sebe, le pheleu ea nyehelo ea secheso, bobeli ba tsona li hloke sepha, u li nyehelle Morena. 3Ho bana ba Iseraele u re: ‘Nkang phooko ea nyehelo e tlosang sebe, le pohoana le konyana, bobeli ba tsona li be le selemo, 'me li hloke sepha, e be tsa nyehelo ea secheso. 4Le nke le pholo le pheleu, tsa sehlabelo sa teboho, li hlabeloe Morena; le nke le nyehelo ea phofo e lubiloeng ka ole, hobane kajeno Morena o tla iponahatsa ho lōna.’ ”
5Ba tlisa kapele ho Tente ea Morena tseo Moshe a ba laetseng tsona. Phutheho eohle ea atamela, 'me ea ema kapele ho Morena. 6Joale Moshe a re: “Sena ke seo Morena a le laetseng ho se etsa, e le hore tlōtla ea Morena e tle e bonahale ho lōna.”
7Moshe a re ho Arone: “Atamela aletareng, u etse nyehelo ea hao e tlosang sebe, le nyehelo ea hao ea secheso; u iketsetse tefelo ea sebe, u be u etsetse le sechaba. U tlise nyehelo ea sechaba, 'me u se etsetse tefelo ea sebe, joalokaha Morena a laetse.”
8Arone a atamela aletareng, 'me a itlhabela pohoana ea nyehelo e tlosang sebe. 9Bara ba hae ba mo tlisetsa mali, 'me a qopetsa monoana oa hae ka maling ao, a tlotsa manaka a aletare ka 'ona, 'me a setseng a a qhalla mothèong oa aletare. 10Mafura, le liphieo, le phapohane, e leng tsa nyehelo e tlosang sebe, a li chesetsa holim'a aletare, joalokaha Morena a ne a laetse Moshe. 11Empa nama le letlalo a li chesetsa kantle ho liahelo.
12Arone a hlaba phoofolo ea nyehelo ea secheso. Bara ba hae ba mo tlisetsa mali, 'me ka 'ona a fōka aletare ho e pota-pota. 13Ba mo tlisetsa litho tsa nyehelo ea secheso, le hlooho; tsena a li chesetsa holim'a aletare. 14A hlatsoa likahare, le litlhako, 'me a li chesetsa holim'a nyehelo ea secheso, e holim'a aletare.
15Joale a tlisa sehlabelo sa secheso sa sechaba, a nka phooko ea secheso, ea nyehelo ea sechaba e tlosang sebe, a e hlaba, a etsa nyehelo e tlosang sebe ka eona, joaloka ea pele.
16A tlisa nyehelo ea secheso, 'me a nyehela ka eona ho ea ka molao. 17A tlisa nyehelo ea phofo, a e ngoatha ka seatla, a e chesetsa holim'a aletare, kathōko ho nyehelo ea secheso seo a ileng a se etsa e sa le hosasa.
18Arone a hlaba pholo le pheleu, e le nyehelo ea sechaba ea teboho. Bara ba Arone ba mo tlisetsa mali, 'me ka 'ona a fōka aletare ho e pota-pota. 19Mafura a pholo le a pheleu: mafura a mohatla, le mohlèhlo, le tšōtso ea liphieo, le phapohane, 20tsena a li bea holim'a lifuba, 'me a li chesetsa holim'a aletare. 21Empa lifuba le serope sa letsoho le letona Arone a li akhōtsa pel'a Morena, e le nyehelo e akhōtsoang, joalokaha Morena a ne a laetse Moshe.
22Joale Arone a phahamisetsa matsoho a hae nqeng ea sechaba, 'me a se hlohonolofatsa. Hoba a etsa nyehelo e tlosang sebe, le nyehelo ea secheso, le nyehelo ea teboho, a theoha.
23Moshe le Arone ba kena ka Tenteng ea Morena. Eaba baa tsoa, ba hlohonolofatsa sechaba, 'me tlōtla ea Morena ea bonahala ho sechaba sohle. 24Mollo oa tsoa ho Morena, oa chesa nyehelo ea secheso, le mafura a holim'a aletare. Ha sechaba sohle se bona hona, sa hōoa ka thabo, 'me sa itihela fatše ka lifahleho.
