MEETLO 25

₁Morena a bua ho Moshe, a le thabeng ea Sinai, a re: ₂“Bua le bana ba Iseraele, u re ho bona: ‘Ha le fihla naheng eo ke le neang eona, masimo a lale, le 'ona a bōlōke phomolo ea Morena. ₃Ka lilemo tse tšeletseng u tla lema tšimo ea hao, ka lilemo tse tšeletseng u faole morara o tšimong ea hao, u kotule tseo e li behileng. ₄Empa ka selemo sa bosupa tšimo e tla lala, e be le selemo se seholo sa phomolo, e leng phomolo ea Morena. U se ke ua lema tšimo ea hao, le morara oa tšimo ea hao ea merara u se ke ua o faola. ₅U se ke ua kotula matšoaboli, u se ke ua kha le morara o sa faoloang oa tšimo ea hao ea merara, e be selemo sa hore tšimo e lale. ₆Empa matšoaboli a tla mela ka selemo sa phomolo e tla ba lijo tsa hao, le tsa mohlanka oa hao, le tsa lekhabunyane la hao, le tsa mohiruoa oa hao, le tsa moeti ea phelang tlung ea hao; ₇le liphoofolo tsa hao, le libatana tsa naha ea heno, matšoaboli ao e tla ba lijo tsa tsona.

₈“ ‘U tla bala lilemo tse supileng tsa phomolo, e be lilemo tse supileng hasupa, e leng lilemo tse mashome a mane a metso e robong. ₉Ka letsatsi la leshome la khoeli ea bosupa u tla letsa lenaka; ka letsatsi la tefelo ea sebe le tla letsa lenaka har'a naha eohle ea lōna. ₁₀Le tla halaletsa selemo sa mashome a mahlano, 'me le phatlalatse har'a naha eohle hore baahi bohle ba eona ba lokolohile. Selemo seo e tla ba sa lōna sa mokete oa tokoloho. Motho e mong le e mong a boelloe ke lefa la hae, e mong le e mong a khutlele ho ba habo. ₁₁Selemo sa mashome a mahlano e tla ba sa mokete oa lōna oa tokoloho. Le se ke la lema letho; le se ke la kotula le matšoaboli, kapa la kha morara o sa kang oa faoloa. ₁₂Selemo seo ke sa mokete oa tokoloho, 'me e tla ba se halalelang ho lōna; le tla ja matšoaboli.

₁₃“ ‘Selemong seo sa mokete oa tokoloho e mong le e mong a boelloe ke lefa la hae.

₁₄“ ‘Ha u rekisetsa mohaeno ho hong, kapa u reka ho hong ho eena, le se ke la qhekanyetsana. ₁₅U reke ntho ea mohaeno ho ea ka palo ea lilemo ho tloha mohl'a mokete oa tokoloho; le eena a u rekisetse ho ea ka palo ea lilemo tsa kotulo tse sa setseng, pelo ho fihla mokete o mong oa tokoloho. ₁₆U tla eketsa theko ho ea ka bongata ba lilemo, u e fokotse ho ea ka bonyenyane ba lilemo, hobane o u rekisetsa kotulo ea lilemo tse hlahlamanang. ₁₇Le se ke la qhekanyetsana, le mpe le tšabe Molimo oa lōna, hobane ke 'na Morena Molimo oa lōna.

₁₈“ ‘Le tla bōlōka melao ea ka, le phethe litaelo tsa ka, le li phethisise, le tle le phele ka boiketlo naheng eo. ₁₉Naha e tla beha litholoana tsa eona, le je, le khore, 'me le phele ka boiketlo ho eona. ₂₀Ha le ka la ipotsa hore na ka selemo sa bosupa le tla ja eng, ha e le moo le sa tl'o lema kapa le kotule, ₂₁ka selemo sa botšelela ke tla le hlohonolofatsa, 'me le tla chaea lijo tse lekaneng lilemo tse tharo. ₂₂Ha le lema ka selemo sa borobeli, le tla be le e-ja thōkō; ka selemo sa borobong, ho fihlela le kotula, le tla be le e-ja linyase.

₂₃“ ‘Naha e se ke ea rekisetsoa ruri, hobane ke ea ka, lōna le baeti le bajaki ho 'na. ₂₄Naheng eohle eo e leng lefa la lōna, le tla lumella hore naha e rekiloeng e boelane le mong'a eona ka ho buseletsa ea e rekileng.

₂₅“ ‘Ha ngoan'eno a futsaneha, 'me a rekisa karolo ea lefa la hae, oa habo, ea tsoalanang le eena, o tla lopolla seo ngoan'abo a se rekisitseng. ₂₆Ha motho a hloka ba habo, empa a e-na le hona ho itefella chelete ea topollo, ₂₇eka khona a bale lilemo tsa thekiso, ebe o lefa moreki chelete e lekanang lilemo tse sa setseng, pele ho mokete oa tokoloho o tlang, 'me moreki a 'museletse seo a se rekileng. ₂₈Haeba a sitoa ho mo lefa hore a tle a boelloe ke naha, naha eo e tla 'ne e be ea ea e rekileng, ho fihlela selemo se tlang sa mokete oa tokoloho. Ka selemo sa mokete oa tokoloho, naha eo e tla khutlela ho mong'a eona oa pele.

₂₉“ ‘Ha motho a rekisa ntlo e motseng o kahar'a lerako, o na le tokelo ea ho e reka hape pele selemo se fela. Tokelo ea hae ea ho e reka e tla nka selemo feela. ₃₀Empa ha selemo se ka fela e e-s'o lopolloe, ntlo eo e motseng o kahar'a lerako, e tla ba ea ea e rekileng, le ea litlōhōlō tsa hae kamehla eohle; e ke ke ea khutlela ho mong'a eona ka mokete oa tokoloho. ₃₁Empa matlo a metseng a seng kahar'a marako, 'ona a tla balelloa e le karolo ea naha e kathōko; a ka lopolloa, 'me ka selemo sa mokete oa tokoloho a tla khutlela ho beng ba 'ona.

₃₂“ ‘Metseng ea Balevi teng, matlo a metseng ea bona a ka lopolloa ka linako tsohle. ₃₃Ha ntlo ea Molevi e motseng o kahar'a lerako e rekisoa ke Molevi, empa e sa lopolloe, e tla khutlela ho mong'a eona ka selemo sa mokete oa tokoloho, hobane matlo a Balevi, a metseng ea Baiseraele, 'ona ke lefa la bona. ₃₄Empa makhulo a mathōkong a metse ea bona a ke ke a rekisoa, hobane ke lefa la bona la mehla eohle.

₃₅“ ‘Ha ngoan'eno a futsaneha, 'me a sitoa ho iphelisa, u mo thuse joalokaha u ka thusa molichaba kapa mojaki, 'me a phele le uena. ₃₆U se ke ua 'matla tsoala kapa phaello, u mpe u tšabe Molimo oa hao, ngoan'eno a tle a phele le uena. ₃₇U se ke ua mo alima chelete ea hao ka ho batla tsoala, kapa lijo tsa hao ka ho batla phaello. ₃₈Ke 'na Morena Molimo oa lōna, ea le ntšitseng naheng ea Egepeta, hore ke tle ke le nee naha ea Kanana, 'me ke be Molimo oa lōna.

₃₉“ ‘Ha ngoan'eno a futsaneha, 'me a ithekisa ho uena, u se ke ua mo sebelisa joaloka lekhoba. ₄₀A phele le uena joaloka mohiruoa kapa joaloka mojaki, 'me a u sebeletse ho fihlela ka selemo sa mokete oa tokoloho. ₄₁Joale o tla lokoloha mosebetsing oa hao, eena le bana ba hae, a khutlele ho ba lelapa la hae, le leruong la bo-ntat'ae, ₄₂hobane ke bahlanka ba ka, bao ke ba ntšitseng naheng ea Egepeta, 'me ba ke ke ba rekisoa joalokaha ho rekisoa makhoba. ₄₃U se ke ua ba sōtla, u mpe u tšabe Molimo oa hao.

₄₄“ ‘Empa makhoba le makhabunyane e tla 'ne e be a hao, e be a tsoang lichabeng tse haufi le uena; ho tsona u ka reka makhoba kapa makhabunyane. ₄₅Le bana ba bajaki ba jakileng ho lōna le ka ba reka, esita le litlōhōlō tsa bona tse tsoaletsoeng naheng ea lōna. E tla ba leruo la hao. ₄₆Le tla ba siela litlōhōlō tsa lōna hore e be lefa la tsona, 'me li ba etse makhoba a mehla eohle. Empa bana beno, ba Baiseraele, le se ke la ba sōtla.

₄₇“ ‘Ha molichaba kapa mojaki ea ahelaneng le uena a rua, eba ngoan'eno ea pel'a hae oa futsaneha, 'me o ithekisa ho molichaba kapa mojaki eo ea ahelaneng le uena, kapa o ithekisa ho setlōhōlō sa lelapa la molichaba eo; ₄₈ha a se a ithekisitse o tla ba le tokelo ea ho lopolloa. E mong oa bana babo a ka mo lopolla. ₄₉Rangoan'ae, kapa mora oa rangoan'ae, kapa e mong ea tsoalanang le eena, a ka mo lopolla; kapa haeba a e-na le matla a ka itopolla. ₅₀Eo o tla rerisana le ea mo rekileng, ba bale nako ho tloha selemong seo a ithekisitseng ka sona, ho ea fihla selemong sa mokete oa tokoloho, 'me chelete ea topollo e lekane le palo ea lilemo, e baloe ho ea ka chelete e lefuoang mohiruoa. ₅₁Haeba ho sa setse lilemo tse ngata pele ho mokete oa tokoloho, morekuoa o tla buseletsa moreki chelete e lekanang lilemo tseo. ₅₂Haeba mokete oa tokoloho o saletsoe ke lilemo tse seng kae, o tla itefella chelete ea topollo, e lekanang lilemo tseo tse sa setseng. ₅₃O tla phela le molichaba eo e le mosebeletsi ea lefuoang ka selemo le selemo, 'me mong'a hae a se ke a mo sōtla moo u ntseng u bona.

₅₄“ ‘Empa haeba a sa lopolloe ka lilemo tsena tse sa setseng, o tla lokoloha ka selemo sa mokete oa tokoloho, eena le bana ba hae. ₅₅Bana ba Iseraele ke bahlanka ba ka; ke bahlanka ba ka, bao ke ba ntšitseng naheng ea Egepeta. Ke 'na Morena Molimo oa lōna.