Ho hlokomela lebone
1Morena a bua ho Moshe, a re:
2“Laela bana ba Iseraele ba u tlisetse ole ea mohloaare e hloekileng, ea ho bonesa, hore lebone le tle le 'ne le tuke kamehla. 3Ka tsatsi le leng le le leng, ho tloha ka phirimana ho fihlela hoseng, Arone o tla le khantša ka Tenteng ea Morena, kapele ho Morena, ka koano ho lesira le siretseng areka ea selekane. Ona ke molao oa mehla eohle melōkong ea lōna. 4Arone o tla bea mabone holim'a seluloana sa 'ona sa khauta e hloekileng, hore a tuke kamehla, kapele ho Morena.
Bohobe bo halalelang
5“U tla nka phofo e thumisehileng, u etse likuku tse leshome le metso e 'meli; kuku ka 'ngoe e etsoe ka phofo e boima ba kilo e le 'ngoe. 6U tla li bea ka mela e 'meli holim'a tafole ea khauta e hloekileng, kapele ho Morena, mola ka mong o be le likuku tse tšeletseng. 7Moleng o mong le o mong u tšèlè mokubetso, hore e tle e be bohobe ba khopotso, ba nyehelo ea secheso e etsetsoang Morena. 8Ka letsatsi le leng le le leng la Sabatha, Arone o tla bea bohobe bona kapele ho Morena kamehla, bo e-tsoa ho bana ba Iseraele, e le selekane sa mehla eohle. 9Bohobe boo e tla ba ba Arone le bara ba hae; ba tla bo jella sebakeng se halalelang, hobane bo halalela ka ho fetisisa ho eena, kaha bo tsoa linyehelong tsa secheso tsa Morena, e le molao oa mehla eohle.”
Kotlo ho ba nyefolang Molimo
10Har'a bana ba Iseraele ho ne ho e-na le monna ea tsoetsoeng ke mosali oa Moiseraele, ntat'ae e le Moegepeta. Monna eona a ea ho bana ba Iseraele liahelong tsa bona. Eaba o loana le monna eo e leng Moiseraele oa sebele. 11Monna enoa ea tsoetsoeng ke mosali oa Moiseraele a nyefola lebitso la Morena, a le rohaka. Eaba ba mo isa ho Moshe. Lebitso la 'm'ae e ne e le Shilomite, morali oa Diberi, oa lelōko la Dane. 12Ba mo kenya chankaneng ho fihlela Molimo a ka ba tsebisa taelo ea hae.
13Morena a bua ho Moshe, a re: 14“Ea rohakaneng eo, mo ntšetseng kantle ho liahelo, 'me bohle ba mo utloileng ha a rohakana ba bee matsoho a bona holim'a hlooho ea hae, ebe sechaba sohle se mo tlepetsa ka majoe. 15Joale u bue le bana ba Iseraele, u re: ‘Motho ofe kapa ofe ea rohakang Molimo oa hae o tla ahloleloa sebe seo sa hae, 16'me ea nyefolang lebitso la Morena, ruri o tla bolaoa. Sechaba sohle se tla mo tlepetsa ka majoe e le kannete. Motho e ka ba mojaki kapa letsoalloa la naha, ha a nyefola lebitso la Morena o tla bolaoa.
17“ ‘Ha motho a otla motho e mong, 'me a 'molaea, le eena o tla bolaoa. 18Ea otlang phoofolo, 'me a e bolaea, o tla lefa phoofolo eo ka phoofolo e 'ngoe.
19“ ‘Ha motho a holofatsa oa habo, le eena a holofatsoe joalokaha a entse; 20ho robeha ho lefshoe ka ho robeha, leihlo ka leihlo, leino ka leino, a etsoe kamoo le eena a entseng e mong kateng. 21Ea bolaeang phoofolo o tla e lefa, 'me ea bolaeang motho, le eena o tla bolaoa. 22Le tla ba le molao o le mong o ahlolang mojaki le letsoalloa la naha ka ho tšoana, hobane ke 'na Morena Molimo oa lōna.’ ”
23Eaba Moshe o bua le bana ba Iseraele, 'me ea rohakaneng ba mo ntšetsa kantle ho liahelo, ba mo tlepetsa ka majoe. Bana ba Iseraele ba etsa joalokaha Molimo a ne a laetse Moshe.
