MEETLO 12

₁Morena a bua ho Moshe, a re:

₂“Bolella bana ba Iseraele, u re: ‘Ha mosali a ithoala, 'me a beleha ngoana oa moshanyana, o tla ba sesila ka matsatsi a supileng, joalokaha a ile linakong tsa hae. ₃Ka letsatsi la borobeli ngoana o tla bōlōtsoa ka ho pongoa leeko. ₄Joale mosali enoa o tla lula matsatsi a mashome a mararo a itlhoekisa lehatlelo la hae; a se ke a ama letho le halalelang, leha a le ho kena ka Sehalalelong, ho fihlela matsatsi a ho itlhoekisa ha hae a fela. ₅Empa ha a ka beleha ngoana oa ngoanana, o tla lula libeke tse peli a le sesila, joalokaha a ile linakong tsa hae, 'me o tla lula matsatsi a mashome a tšeletseng a itlhoekisa lehatlelo la hae.

₆“ ‘Hoba a belehe ngoana oa moshanyana kapa oa ngoanana, ha matsatsi a hae a ho itlhoekisa a felile, o tla tlisa ho moprista, monyakong oa Tente ea Morena, konyana e nang le selemo, e le nyehelo ea secheso, le lelinyane la leebana kapa leebana-khoroana, e le nyehelo e tlosang sebe. ₇Moprista o tla nyehella Morena ka tsona, a mo etsetse tefelo ea sebe, 'me joale o tla hloeka lehatlelong la hae. Ona ke molao oa motsoetse ea belehang ngoana oa moshanyana kapa oa ngoanana.

₈“ ‘Empa ha a ka hloka konyana, o tla nka maebana-khoroana a mabeli, kapa maeba a mabeli, le leng e be la nyehelo ea secheso, le leng e be la nyehelo e tlosang sebe. Moprista o tla mo etsetsa tefelo ea sebe, 'me o tla hloeka hape.’ ”