Majoe a khopotso
1Ha sechaba sohle se se se tšetse Jorodane, Morena a bua ho Joshua, a re: 2“Khethang banna ba leshome le metso e 'meli, morabeng o mong le o mong le khethe monna a le mong. 3Le ba laela, le re: ‘Nkang majoe bohareng ba Jorodane, moo maoto a baprista a neng a eme teng; e be majoe a leshome le metso e 'meli. Le tšele le a nkile, le fihle le a bee moo le tla robaletsa teng bosiung bona.’ ”
4Joshua a bitsa banna ba leshome le metso e 'meli, ba khethiloeng har'a bana ba Iseraele, morabeng o mong le o mong ho khethiloe monna a le mong. 5Joshua a re ho bona: “Fetelang kapele ho areka ea Morena Molimo oa lōna, le ee bohareng ba Jorodane. Monna e mong le e mong a nke lejoe le le leng, ho ea ka palo ea merabe ea bana ba Iseraele, a le jare ka lehetla. 6Majoe ana e tla ba khopotso har'a lōna ka mehla e tlang. Ha bana ba lōna ba le botsa, ba re: ‘Majoe aa a bolela'ng?’ 7le tla re ho bona: ‘A bolela hore metsi a Jorodane a ne a parōhe ka lehare, kapele ho areka ea selekane sa Morena. Ha areka e tšela Jorodane, metsi a Jorodane a ne a parōhe ka lehare, 'me majoe ana e tla ba khopotso ho bana ba Iseraele kamehla eohle.’ ”
8Bana ba Iseraele ba etsa joalokaha Joshua a ba laetse. Ba nka majoe a leshome le metso e 'meli bohareng ba Jorodane, ho ea ka merabe ea bona, joalokaha Morena a ne a ile a bua ho Joshua. Ba tšela ba a nkile ho ea moo ba neng ba tla robaletsa teng, ba a bea hona moo.
9Joshua a hloma majoe a leshome le metso e 'meli bohareng ba Jorodane, sebakeng seo maoto a baprista ba neng ba jere areka ea selekane a neng a eme teng, 'me le kajeno-ea-bokajeno a ntse a le hona moo.
10Baprista ba neng ba jere areka ba ema bohareng ba Jorodane, ho fihlela ha ho phethiloe tsohle tseo Morena a neng a laetse Joshua ho li bolella sechaba, ho ea ka tsohle tseo Moshe a neng a li laetse Joshua. Sechaba sa potlaka, sa tšela nōka. 11Eare ha sechaba sohle se se se tšetse, joale ha tšela areka ea Morena, le baprista, ba fetela kapele ho sechaba. 12Ba morabe oa Rubene, le ba morabe oa Gade, le ba karolo e 'ngoe ea morabe oa Manase, ba tšela ba hlometse, ba eteletse bana ba Iseraele pele, joalokaha Moshe a ne a ba laetse. 13Ba ileng ba tšela e ne e ka ba likete tse mashome a mane, tsa ba hlomeletseng ntoa, ba il'o loana liphuleng tsa Jeriko, moo Morena a ntseng a ba bona.
14Ka letsatsi leo, Morena a hōlisa Joshua moo Baiseraele bohle ba ntseng ba bona; ba mo tšaba ka matsatsi 'ohle a bophelo ba bona, joalokaha ba ne ba tšaba Moshe.
15Morena a bua ho Joshua, a re: 16“Laela baprista ba jereng areka ea selekane hore ba nyolohe ka nōkeng ea Jorodane.”
17Joshua a laela baprista, a re: “Nyolohang ka nōkeng ea Jorodane.”
18Baprista ba neng ba jere areka ea selekane sa Morena ba nyoloha ho tloha bohareng ba Jorodane. Hang-hang ha maoto a baprista bao a qala ho hata mobung o ommeng, metsi a Jorodane a khutlela litulong tsa 'ona, a saballa mabōpong 'ohle joaloka pele.
19Ka letsatsi la leshome khoeling ea pele, sechaba sa tšela Jorodane, sa hloma Gilegale, moeling o ka bochabela oa Jeriko. 20Majoe ane a leshome le metso e 'meli, ao baprista ba ileng ba a nka ka nōkeng ea Jorodane, Joshua a a hloma Gilegale. 21A bua ho bana ba Iseraele, a re: “Ka mehla e tlang, ha bana ba lōna ba botsa bo-ntat'a bona, ba re: ‘Majoe aa a bolela'ng?’ 22le tle le ba bolelle, le re: ‘Baiseraele ba ne ba tšele nōka ena ea Jorodane mobu oa eona o omme. 23Morena Molimo oa lōna, o ne a pshese metsi a Jorodane kapele ho rōna, ho fihlela le tšetse bohle, joalokaha Morena Molimo oa lōna, a ne a pshese metsi a Leoatle la Lehlaka kapele ho rōna, ho fihlela re tšetse bohle. 24Lichaba tsohle tsa lefatše li tla tseba hore letsoho la Morena le matla, 'me le lōna le tla tšaba Morena Molimo oa lōna, kamehla eohle.’ ”
