Joshua o laea sechaba
1Ha ho se ho fetile nako e telele Morena a phomolitse Baiseraele lintoeng tsa bona le ho lira tsohle tsa bona tse neng li ba pota-potile, Joshua a 'na a tsofala, lilemo tsa hae tsa 'na tsa ea. 2Ke ha Joshua a phutha Baiseraele bohle, le baholo ba bona, le lihlooho tsa bona, le baahlōli ba bona, le balaoli ba bona, 'me a re ho bona: “Ke se ke tsofetse, le lilemo tsa ka li se li ile. 3Le bone tsohle tseo Morena Molimo oa lōna, a li entseng ho lichaba tsena tsohle, ka baka la lōna. Morena Molimo oa lōna, ke eena ea le loanetseng. 4Ke le abetse naha ea lichaba tsena tse sa ntsaneng li setse, le ea lichaba tsohle tseo ke li ripitlileng ho tloha Jorodane, ho ea fihla Leoatleng le Leholo, nq'a bophirimela, hore e be lefa la lōna. 5Morena Molimo oa lōna, ke eena ea tla li leleka, a li falatse kapele ho lōna, 'me naha ea tsona e be ea lōna, joalokaha Morena Molimo oa lōna, a le tšepisitse.
6“Ka baka leo, tieang, le bōlōke, 'me le phethe tsohle tse ngotsoeng Bukeng ea Molao oa Moshe; le se ke la o kheloha joang kapa joang. 7Le se ke la kopa-kopana le lichaba tsena tse setseng har'a lōna; le se ke la bua le ka mabitso a melimo ea tsona, kapa la hlapanya ka eona, kapa la e sebeletsa, kapa la e khumamela. 8Le khomarele Morena Molimo oa lōna, joalokaha le entse ho fihlela kajeno.
9“Morena o falalitse lichaba tse kholo, tse matla, kapele ho lōna, 'me ha ho ea kileng a ema kapele ho lōna ho fihlela kajeno. 10Monna a le mong oa lōna o lelekile batho ba sekete, hobane Morena Molimo oa lōna, ke eena ea le loanetseng, joalokaha a ne a le tšepise. 11Ka baka leo, itlhokomeleng, le rate Morena Molimo oa lōna.
12“Haeba le ka koeneha, la khomarelana le masalla a lichaba tsena a setseng har'a lōna, la nyallana le 'ona, la kopa-kopana le 'ona, 13le hle le tsebe hore Morena Molimo oa lōna, a ke ke a hlola a falatsa lichaba tsena kapele ho lōna. Lichaba tseo e tla ba leraba le sefi ho lōna, le phafa likhopong tsa lōna, le meutloa ka mahlong a lōna, ho fihlela le timela naheng ena e ntle, eo Morena Molimo oa lōna, a le neileng eona.
14“Bonang, kajeno le 'na ke ea boea-batho. Botebong ba lipelo tsa lōna, le maikutlong a lōna, le tseba hantle hore ha ho ntho le e 'ngoe ea lintho tsohle tse molemo, tseo Morena Molimo oa lōna, a le tšepisitseng tsona, e sa kang ea phethahala. Tsohle li phethahetse, ha ho le e 'ngoe e sa kang ea phethahala. 15Joalokaha lintho tsohle tse molemo, tseo Morena Molimo oa lōna, a neng a le tšepisitse tsona li ile tsa phethahala, ka mokhoa o joalo Morena o tla le tlisetsa tsohle tse mpe, ho fihlela a le timetsa naheng ena e ntle, eo Morena Molimo oa lōna, a le neileng eona. 16Haeba le roba selekane sa Morena Molimo oa lōna, seo a le laetseng sona, eba lea tsamaea le il'o sebeletsa melimo e meng, lea e khumamela, bohale ba Morena bo tla le tlōkōmela, 'me le tla timela ka ho panya ha ntši naheng ena e ntle, eo a le neileng eona.”
