JOBO 26

₂“Ua tla ua thusa

motho a fokola!

Ua tl'a pholosa letsoho le fokola!

₃U elelitse sethoto

hantle hakaakang!

U bontšitse tsebo

e kholo hakaakang!

₄U rutiloe ke mang

ho bua polelo tsee?

Polelo tseo u li buang

ke tsa mang?

₅“Ba ka mabitleng baa thōthōmela,

le tsohle tse tlas'a metsi,

tse phelang ho 'ona.

₆Qalo ea Bafu

e feela kapel'a Molimo,

mohohlo oa timelo o ahlame,

ha oa koaheloa.

₇Molimo o sarolotse leboea

holim'a sepakapaka,

a leketlisa lefatše

holim'a bofeela-feelane.

₈O phuthetse metsi

kahar'a maru a hae;

ha ho leru le phatloloang

ke boima ba metsi!

₉Khoeli ha e tōlōkile oa e fifatsa,

ka maru a hae a e etsetse lesira.

₁₀O ralile selikalikoe,

a se rala holim'a leoatle,

a etsa moeli

ho arohanya leseli le lefifi.

₁₁Tšiea tsa leholimo

le tsona lia reketla,

li reketla

ke ho tšoha khalemelo ea hae.

₁₂Ka matla a hae

leoatle a le tsosa maqhubu,

ka bohlale ba hae

a tamukanya Rahaba.

₁₃Ka moea oa hae

a ntlafatsa maholimo,

ka tsoho la hae

a hlaba nōha e lèlèsèla.

₁₄Tsena ke linyane feela

tsa matla a hae,

tse boleloang ka eena

ke lehoèshèhoèshè;

boholo ba matla a hae

bo ka utloisisoa ke mang?”