JOBO 24

₁“Na Ea Matla 'ohle

tsatsi la kahlōlo ha a le tsebe?

Ba mo sebeletsang

nako ea lona baa e tseba?

₂“Ba khopo ba suthisa

mekolokotoane ea meeli,

ba utsoe mehlape,

ba be ba e katle.

₃Tonki ea khutsana

ba e khōthela pele,

pholo ea mohlolohali

ba e nkele peeletso.

₄Ba thesela bafumanehi

hore ba suthe tseleng,

mafutsana 'ohle

a phela ka ho ipata.

₅“Joaloka tonki e hlaha lehoatateng,

mafutsana a tsohella mosebetsing,

ho ea sèla,

lefeella ke lona

le fepang bana ba 'ona.

₆A kotula lijo masimong a ba khopo,

a khoahlapise morara

rapeng tsa ba khopo.

₇A robala a le feela

ke ho hloka kaparo,

rame se fella holim'a 'ona

ke ho hlōbōla.

₈Mafutsana a kolobisoa

ke melupe ea thaba,

a b'a maname mafikeng

ke ho hloka lephèphè.

₉“Khutsana e hlōthoa letsoeleng,

tsoeleng la 'm'a eona,

mofutsana o lefa molato

ka lesea la hae.

₁₀Ba tsamaisa mafutsana

a se na le nketlana,

a thōtha lihlopha tsa koro

a nts'a lapile,

₁₁a tulela

tholoana tsa mohloaare matlapeng,

a etsa ole,

a tlhōtla veine morareng

a ntse a nyoriloe.

₁₂Melumaelo ea ba shoang

e utloahala har'a motse,

ba tsoileng likotsi

ba llela hore ba thusoe,

empa thapelo tsa bona

Molimo ha a li natse.

₁₃“Ho na le ba bang

ba hloileng leseli,

ba sa tsebeng tsela tsa lona

le ho tsamaea ka tsona.

₁₄'Molai o tsoha ha mafube a hlaha,

a bolaee mofumanehi,

a bolaee le mofutsana;

athe bosiu teng

o fetoha lesholu hantle.

₁₅Sehlola sea lebella,

se lebella hore shoalane e tšoare,

se re:

‘Ha nka ke ka bonoa ke ōpè,’

ebe joale se ikoahela sefahleho.

₁₆Bosiu masholu a thuakanya matlo,

motšeare teng ebe aa ipata;

leseli lona ha a kopane le lona.

₁₇Ho 'ona 'ohle

fifi le tšoana le motšeare,

matšabelo a lefifi

ho masholu ke metsoalle.

₁₈“Ba joalo ba ka mahōhōli

a loebang holim'a metsi,

masimo a bona a neiloe thōhako,

ha ho ea eang

rapeng tsa bona tsa morara.

₁₉Joalokaha komello le mocheso

li qhibilisa lehloa,

lebitla le lona

baetsalibe lea ba metsa.

₂₀Pōpelo e tla ba lebala,

libōkō li ba nyabèlè;

ba ke ke ba hlola ba sa hopoloa,

bokhopo bo tla fela

sa fate sa robehile.

₂₁Mosali oa nyōpa baa mo sōtla,

mohlolohali eena

ba mo hlokele mohau.

₂₂Ka matla a hae

Molimo o lelefatsa bophelo,

o lelefatsa bophelo ba bo-ramonatla,

ba ka tsitsa,

tšepa la ho phela lona ha le eo.

₂₃Oa ba sireletsa,

ba be ba rue letšepa,

athe metsamao ea bona

eona o e lisitse.

₂₄Ba tuma ka nakoana,

ba be ba nyamele,

ba theoloe likalaneng,

ba timetsoe joaloka bohle,

ba shoe sa liako tsa koro

ha li khaoloa.

₂₅“Haeba ho se joalo,

nka shanofatsoa ke mang?

Ke mang ea ka reng

polelo tsa ka ke tsa bosaoana?”