JOBO 2

₁Ke letsatsi le leng hape mangeloi a Molimo a tla kapele ho Morena, 'me Satane le eena a tla le 'ona kapele ho Morena. ₂Eaba Morena o re ho Satane: “U tsoa kae?”

Satane a araba Morena, a re: “Ke tsoa koana lefatšeng, moo ke neng ke ntse ke ralotsa, ke hahlaula teng.”

₃Joale Morena a re ho Satane: “Na u kile ua bona Jobo, mohlanka oa ka? Ha ho ea kang eena lefatšeng! Ke monna ea lokileng, ea hlokang koli, ea tšabang Molimo, ea khesang bobe. Le hoja u ile ua nkhothaletsa hore ke mo senyetse ntle ho lebaka, o ntse a tšepahala haholo.”

₄Satane a araba Morena, a re: “Letlalo ke thèbè ea pelo! Motho a ka tela tsohle tseo a nang le tsona, hore a ipholose. ₅Empa hona joale, ha u ka mo ama ka letsoho la hao, ua ama masapo a hae le nama ea hae, o tla u rōhaka sefahla-mahlo!”

₆Morena a re ho Satane: “Ho lōkile, o matsohong a hao, feela u baballe bophelo ba hae.”

₇Eaba Satane o tloha kapele ho Molimo, o etsa hore Jobo a bērēhè liso ho tloha bohatong ba leoto ho ea fihla kaholim'a hlooho. ₈Jobo a nka lengetana, a ea lula thōtōbōlōng, a ikhoabitla ka lona.

₉Joale mohats'a hae a re ho eena: “Na u sa ntsane u tiiselitse ho tšepahaleng hoo ha hao? Rōhaka Molimo, u tsoe u e-shoa!”

₁₀Empa Jobo a re ho eena: “U bua joaloka mosali ea sethoto! Na re ka amohela tse molemo feela tse tsoang ho Molimo, eaba ha re amohele tse bohlōkō?”

Ho tsena tsohle, Jobo ha aa ka a etsa sebe ka seo a se buileng.

₁₁Ha metsoalle e meraro ea Jobo, e leng Elefase ea tsoang Temana, le Biledade ea tsoang Shua, le Sofara ea tsoang Naama, e utloela tsena tsohle tse bohlōkō tse mo hlahetseng, ea mo etela; motho ka mong a e-tsoa hahabo. Banna bana ba ne ba lumellane hore ba tle 'moho, ho tla lla le eena, le ho mo tšelisa. ₁₂Ha ba 'mona ba sa le thōkoana, ba batla ba sa mo tsebe. Ba lla sa 'mokotsane, ba hahōla liaparo tsa bona, ba khōphōlela lerōle holimo, ba le tšèla holim'a lihlooho tsa bona. ₁₃Ka matsatsi a supileng le masiu a supileng, ba lula le eena thōtōbōlōng moo, ho se ea 'muisang, hobane ba ne ba bona hore o opeloa haholo.