Biledade o hlalosa pheletso ea ba khopo
1Eaba Biledade ea tsoang Shua oa araba, o re:
2“Ho shoahla ha hao
ho tla khaotsa neng?
Imamele pele, re ntan'o buisana!
3U re talimela'ng
joaloka liphoofolo?
Mahlong a hao re le mahèlèhèlè?
4Khalefo ea hao e u entse maharōla!
U re fatše le furalloe
ka baka la hao?
Mafika a suthisoe tulong tsa 'ona?
5“Bone le ea khopo
ke lona le tla tingoa;
tlhase ea mollo oa hae
e ke ke be ea hotela.
6Ka lapeng la hae seli le tla fifala,
Bone la hae lona le time.
7Mehato ea hae e hoantang
e tla thèrèkèla,
a kulupanngoe fatše
ke masene a hae.
8Maoto a hae
a mo akhela ka letlōoeng,
o nts'a itsamaela holim'a leraba;
9sefi se tla khata serèthè sa hae,
letlōoa le mo tšoase, le mo harele;
10mobung ba mo patetse sekhoqetsane,
tseleng ea hae ba mo chehetse sefi.
11Matšabeho a lefu
a mo tšosa kahohle,
hohle moo a eang teng a mo salame.
12Tlala e felisa matla a hae, a fokole,
hang ha a hlōleha
koluoa e mo oela holimo.
13Boloetse bo mo nathōlōtsa letlalo,
litho tsa hae
li jeoa ke lefu le tšabehang.
14Boiketlong ba lapa la hae
oa thakhōloa,
o khōtheloa pele
ho ea ho khosi ea matšabeho;
15lapeng la hae
ho tla nonotsoa ka sebabole,
basele ba tle ba phele
ka ho lona.
16Metso ea hae e omèllèla mobung,
kaholimo mahaba a hae
'ona a be a pone.
17Hohle lefatšeng oa lebaloa,
literateng ha ho sa buuoa
ka lebitso la hae,
18o lelekoa leseling, a isoe lefifing,
hohle lefatšeng ebe oa falatsoa.
19Chabeng sa habo ha a na ngoana,
leha e le setlōhōlō,
lapeng la hae
ha hoa sala le thokoloana.
20Melōko e mo hlahlamang
e tla tšosoa ke pheletso ea hae,
e boneng ka mahlo
eona e tšoaroe ke thōthōmelo.
21Ona ke mokho'a ho fela
ha lapa la ea khopo,
le joalo lehae
la ea sa natseng Molimo.”
